مەڵبەندى سلێمانى یەکێتى: کاردەکەین بۆئەوەی سلێمانی هەمیشە لە پێشکەوتندا بێت

PUKMEDIA

لۆگۆى یەکێتیى نیشتمانیى کوردستان

مەڵبەندی یەکى سلێمانی یەکێتی، بۆ یادى 241 ساڵەى دامەزراندنى شارى سلێمانى پەیامێکی بڵاوکردەوە و رایگەیاند: وەک مەڵبەندی یەکی سلێمانی یەکێتیی نیشتمانیی کوردستان، پەیمان دووپاتدەکەینەوە کە درێژەپێدەری رێبازی خزمەتکردنی ئەم شارە و دانیشتووانە سەربەرزەکەی دەبین، کار دەکەین بۆ ئەوەی سلێمانی هەمیشە لە گەشەکردن و پێشکەوتندا بێت و شایستەی ئەو هەموو قوربانیدان و تێکۆشانە بێت کە لەپێناویدا دراوە.

دەقى پەیامەکە:

پەیامی پیرۆزبایی بەبۆنەی (٢٤١)ەمین ساڵیادی بنیادنانی شاری سلێمانی

بەبۆنەی یادی بنیادنانی شاری سلێمانی، پایتەختی ڕۆشنبیری و قەڵای هەڵمەت و قوربانییەوە، گەرمترین پیرۆزبایی لە خۆمان و لە تەواوی خەڵکی خۆڕاگر و تێکۆشەری ئەم شارە زیندووە دەکەین.

سلێمانی، هەر لە یەکەم ڕۆژی بونیادنانییەوە لەسەر دەستی ئیبراهیم پاشای بابان، تەنها شارێک نەبووە، بەڵکو قوتابخانەیەکی مەزنی نیشتمانپەروەری، ناوەندێکی گەشی ڕۆشنبیری و داڵدەیەک بووە بۆ ئازادیخوازان و بیرمەندانی گەلەکەمان.

مێژووی ئەم شارە، مێژووی بەرگری و قوربانیدانە، لە شۆڕشەکانی بابان و حەفیدەوە تا دەگاتە ڕاپەڕینە مەزنەکەی ساڵی ١٩٩١ و قوربانیدانی بەردەوامی لەپێناو پاراستنی دەستکەوتەکاندا.

شانازییەکی گەورەیە کە سلێمانی هەمیشە پێشەنگ بووە لە خەباتی سیاسی، مەدەنی و فیکریدا، ئەم شارە لانکەی شاعیران و نووسەران و هونەرمەندان بووە و وەک چیاکانی سەربەرز و شکۆدار ماوەتەوە.

وەک مەڵبەندی یەکی سلێمانی یەکێتیی نیشتمانیی کوردستان، پەیمان دووپات دەکەینەوە کە درێژەپێدەری ڕێبازی خزمەتکردنی ئەم شارە و دانیشتووانە سەربەرزەکەی دەبین، کار دەکەین بۆ ئەوەی سلێمانی هەمیشە لە گەشەکردن و پێشکەوتندا بێت و شایستەی ئەو هەموو قوربانیدان و تێکۆشانە بێت کە لەپێناویدا دراوە.

جارێکی دیکە، ئەم یادە لە هەموو لایەک پیرۆز بێت، سڵاو بۆ گیانی پاکی شەهیدانی سلێمانی و تەواوی کوردستان.

مەڵبەندی سلێمانی
یەکێتیی نیشتمانیی کوردستان
١٤ی تشرینی دووەمی ٢٠٢٥

PUKMEDIA