د. لەتیف رەشید: سلێمانى نمونەیەکە لە جوانییەکانی هەرێمی کوردستان و عیراق

نوسینگەی راگەیاندنی سەرۆککۆمار

د.لەتیف جەمال رەشید سەرۆککۆماری عیراق

د. لەتیف جەمال رەشید سەرۆککۆماری عیراق، بۆ یادى 241 ساڵەى بونیادنانى سلێمانى پەیامێکى بڵاوکردەوە و رایگەیاند: سلێمانی پێشەنگ بووە لە بەرەنگاربونەوەی زوڵم و زۆرداریی رژێمە ستەمکارەکانی عیراق  و هەمیشە دەیویست ئازاد و سەربەست و دور لە سەرکوتکردن بژی و لەم پێناوەدا سەرکردەکانی کورد وەک شێخ مەحمودی حەفید خەباتیان کردووە، لە پێناو بەدەستهێنانی مافی رەوای گەلی کورد و بەهێزکردنی دۆستایەتی لەگەڵ گەلی عەرەب و پێکهاتەکانی دیکە.

دەقى پەیامەکە:

ئەمساڵ سلێمانی یادی 241 ساڵەی بونیادنانی دەکاتەوە، کە لەسەردەستی بابانەکان و لە لایەن ئیبراهیم پاشای بابان لە ساڵی 1784 دامەزرا و لە سەرەتای دروستبونیەوە تا ئەمرۆ پێشەنگ بوە، لە کاروانی پێشکەوتنی شارە گەورە و گرنگەکانی عیراق و تەنانەت ناوچەکەشدا و بۆتە نمونەیەک لە جوانییەکانی هەرێمی کوردستان و عیراق.

شاری سلێمانی بەدرێژایی مێژوو بۆتە سیمبولی خەبات و تێکۆشان و خزمەت بە نیشتمان.

ئەم شارە خاوەن کەسایەتی سیاسی و خەباتکار و رۆشنبیر و نوسەر و شاعیر و دڵسۆزی خاک و وڵاتە و بەدرێژایی تەمەنیان خزمەتیان بە مرۆڤایەتی کردوە.

سلێمانی پێشەنگ بووە لە بەرەنگاربونەوەی زوڵم و زۆرداریی رژێمە ستەمکارەکانی عیراق  و هەمیشە دەیویست ئازاد و سەربەست و دور لە سەرکوتکردن بژی و لەم پێناوەدا سەرکردەکانی کورد وەک شێخ مەحمودی حەفید خەباتیان کردووە، لەپێناو بەدەستهێنانی مافی ڕەوای گەلی کورد و بەهێزکردنی دۆستایەتی لەگەڵ گەلی عەرەب و پێکهاتەکانی تر.

 هەر لەم چوارچێوەیەدا رۆشنبیرەکانی کورد و عەرەب دۆستایەتی بەهێز و پێکەوە تێکۆشانیان هەیە لەپێناو بەدیهێنانی ئامانجە هاوبەشەکان.

ئەم شارە زیندوەی نیشتمان لە بونیادنانی عیراقێکی دیموکراتی ئازادی فیدراڵدا رۆڵێکی بەهێزی گێڕا، جێ دەستی دیارە لە هێنانەکایەی عیراقێکی جیاوازی دوور لە دیکتاتۆرییەت، هەربۆیە شایستەی ئەوەیە لە خێر و خۆشی و سامانی نیشتماندا بایەخی زیاتری پێبدرێت و کاربکرێت بۆ ئەوەی جوانتر و جوانتر بێت.

ئێمە لە سەرۆکایەتی کۆمار هەمیشە هەوڵمانداوە بۆ خزمەتکردنی هەموو پارێزگا و شارەکانی نیشتمان، دەمانەوێت خزمەتگوزاری و گەشەپێدان و پێشکەوتنی شارەکانی وڵات لە باشترین ئاستدا بێت.

سلێمانی و هەموو شارەکانی نیشتمانەکەمان هەر گەشاوە و ئارام بن.

 د. لەتیف جەمال رەشید
سەرۆک کۆماری عیراق

PUKMEDIA