شێخ جەعفەر: لەم كابینەیەدا ئازادییەكان بەرتەسككرانەوە

PUKMEDIA

شێخ جەعفەر شێخ مستەفا لێپرسراوی ئەنجومەنی پاراستنی بەرژەوەندییە باڵاكانی یەكێتی

شێخ جەعفەر شێخ مستەفا لێپرسراوی ئەنجومەنی پاراستنی بەرژەوەندییە باڵاكانی یەكێتیی نیشتمانیی كوردستان رایدەگەیەنێت: "لەم ساڵانەدا رێڕەویی دەسەڵاتدارێتی بەئاقارێكی نادروستدا ئاڕاستەكراوەو جیاوازییەكی بەرچاو لەنێوان ناوچە جیاجیاكانی هەرێم دەكرێت و بابەتی ئازادییەكان بەرتەسك كرانەوە".

لە میانی كۆبوونەوەیەكی جەماوەریدا لەگەل ژمارەیەكی زۆر لە كەسایەتییە كۆمەڵایەتی و تێكۆشەرو چین وتوێژەكانی سنووری شارباژێڕ كە زیاد  شەهید جەبار لێپرسراوی مەڵبەندی رێكخستنی سلێمانی و مامۆستا جوامێرو جوتیار نوری و ئاوات محەممەد ئامادەیبوون، وتی: "فیداكاریی و  خەباتی نەپساوەی رۆڵەكانی ئێوە، پێكهێنانی پەرلەمان و حكومەتی هەرێمی لێكەوتەوە كە لەسەرەتاوە تا كابینەی نۆیەم خزمەتگوزاریی باش پێشكەش كرا، بەڵام لەم ساڵانەی دواییدا رێڕەویی دەسەڵاتدارێتی بەئاقارێكی نادروستدا ئاراستەكراو جیاوازییەكی بەرچاو لەنێوان ناوچە جیاجیاكانی هەرێم دەكرێت و بابەتی ئازادییەكان بەرتەسك كرانەوە، جگە لەوەش قۆرغكردنی دەسەڵات هاتووەتە ئاراوە".

"ئەركی یەكێتیی نیشتمانیی كوردستان و هێزە دەربەستەكانی سەر گۆڕەپانی سیاسی كوردستانە، پشت ئەستوور بە پاڵپشتی كۆمەڵانی خەڵك رێڕەوی دەسەڵاتدارێتی لە هەرێم بگۆڕن و بیهێنەوە سەر شاڕێگای كوردایەتی و خزمەتكردنی میللەتەكەمان".

هاوكات، جارێكی تریش جەختی لەسەر هەڵوێست و روئیای نیشتمانیی سەرۆك بافڵ جەلال تاڵەبانی و سەركردایەتی یەكێتی كردەوە، سەبارەت بە پێویستی یەكخستنەوەی پێشمەرگەو دامەزراندنی سوپایەكی یەكگرتوو، لەپێناو پاراستنی خەڵكی كوردستان لەهەر هەڕەشە و مەترسییەك، سەرباری بایەخی پێكهێنانی هاوپەیمانێتییەكی پتەوی نێوان هێزو لایەنە سیاسییەكان و دەستەبەركردنی تەبایی و یەكڕیزی میللەتەكەمان و بەرەنگاربوونەوەی ئاڵنگارییە جۆراوجۆرەكان.

PUKMEDIA