ئەنجومەنی وەزیرانی عیراق: بەردەوامدەبین لە ناردنی مووچە بۆ هەرێم

PUKMEDIA

کۆبوونەوەی ئەنجومەنی وەزیرانی عیراق

ئه‌نجومه‌نی وه‌زیرانی عیراق له‌كۆبوونه‌وه‌ی ئاسایی ئه‌مڕۆیدا بڕ‌یاریدا مووچه‌ راگیراوه‌كانی ئه‌و مووچه‌خۆرانه‌ی كه‌ تائێستا بایۆمه‌ترییان نه‌كردوه‌و له‌مانگی شوباته‌وه‌ مووچه‌كانیان راگیراوه‌ بۆ هه‌رێم بنێرێت، هه‌روه‌ها بڕیاریدا به‌خه‌رجكردنی مووچه‌ی مووچه‌خۆرانی هه‌رێم به‌مانگی حه‌وتیشه‌وه‌ تاكۆتایی ساڵی 2024.

ئامانج ره‌حیم سكرتێری ئه‌نجومه‌نی وه‌زیرانی حكومه‌تی هه‌رێم به‌ وێبسایتی ره‌سمی یه‌كێتیی نیشتمانیی كوردستان PUKMEDIA ی راگه‌یاند: "ئه‌نجومه‌نی وه‌زیرانی عیراق له‌كۆبوونه‌وه‌ی ئه‌مڕ‌ۆی ده‌نگیدا له‌سه‌ر په‌سه‌ندكردنی ڕ‌اسپارده‌ی كۆبوونه‌وه‌ی هاوبه‌شی دوێنێی ئه‌نجومه‌نی ئابووری فیدڕ‌اڵ و هه‌رێمی كوردستان بۆ ناردنی مووچه‌ ڕ‌اگیراوه‌كانی هه‌رێم له‌مانگی شوباته‌وه‌ تا مانگی ئاب، كه‌ ئه‌م بڕیاره‌ ئه‌و مووچه‌خۆرانه‌ ده‌گرێته‌وه‌ كه‌ تائێستا بایۆمه‌ترییان نه‌كردوه‌و شه‌ش مانگه‌ مووچه‌كانیان راگیراوه‌".

"هه‌روه‌ها له‌كۆبوونه‌وه‌كه‌دا بڕیاردراوه‌ كه‌ ناردنی مووچه‌ بۆ هه‌رێم تا كۆتایی ئه‌مساڵ به‌رده‌وامبێت" ئامانج ره‌حیم وای وت.

به‌پێی زانیارییه‌كانی PUKMEDIA هه‌ر له‌كۆبوونه‌وه‌ی ئه‌نجومه‌نی وه‌زیراندا بڕیاردراوه‌ كه‌ مووچه‌ی مانگی حه‌وتیش بۆ هه‌رێم بنێدرێت، كه‌ پێشتر به‌هۆی كێشه‌ی ته‌كنیكییه‌وه‌ مووچه‌ی مانگی هه‌شت له‌به‌غداوه‌ نێدرابوو، به‌ڵام مووچه‌ی مانگی حه‌وت راگیرابوو، هاوكات وه‌زاره‌تی دارایی هه‌رێم ئه‌و پاره‌یه‌ی كه‌ بۆ مووچه‌ی مانگی هه‌شت نێدرابوو، بۆ مووچه‌ی مانگی حه‌وت خه‌رج كرد.

لە بەرامبەردا ئەنجومەنی وەزیرانی عیراق تەئكیدیكردەوە کە دەبێت هەرێم تەواوی گرفتە تەكنیکیەكانی مووچە تاكۆتایی ئەمساڵ چارەسەربكات.

PUKMEDIA