مەكتەبی هەڵبژاردن و یۆنامی: هەڵبژاردنێكی بێگەرد بۆ پەرلەمان بكرێت

PUKMEDIA

رزگار حاجی حەمە، حاكم سابیر، تیمی هاریكاری هەڵبژاردنی سەر بە نێردەی نەتەوەیەكگرتووەكان

سەر لە بەیانی 8-9-2024، رزگار حاجی حەمە لێپرسراوی مەكتەبی هەڵبژاردن، لە بارەگای مەكتەبی سیاسی لە هەولێر، بە ئامادەبوونی حاكم سابیر، لێپرسراوی بۆردی كارگێڕی هەڵبژاردن، لەگەڵ تیمی هاریكاری هەڵبژاردنی سەر بە نێردەی نەتەوەیەكگرتووەكان (یۆنامی) كۆبووەوە.

پڕۆسەی هەڵبژاردنی پەرلەمانی كوردستان و هەڵبژاردنێكی شەفاف و ئارام تەئكیدی لەسەر كرایەوە.

لەكۆبوونەوەكەدا لێپرسراوی مەكتەبی هەڵبژاردن جەختی لە گرنگی رۆڵی یۆنامی و تیمی هاریكاری هەڵبژاردن و بەڕێوچوونی پرۆسەی هەڵبژاردن لە كەشێكی ئارامدا كردەوە.

داواشی لە (یۆنامی) كرد، لە نزیكەوە رۆڵی خۆی بگێڕێت بۆ زامنكردنی بەڕێوەچوونی پرۆسەی هەڵبژاردنی پەرلەمانی كوردستان بەشێوەیەكی هێمنانە، هەروەك چۆن لە هەڵبژاردنەكانی ساڵانی 2021 و 2023 پشگیری و هاریكاری (یۆنامی) و ئامادەیی كاریگەر و چالاكانەی نوێنەرەكانی لەسەرجەم پارێزگاكاندا، دیاریترین رۆڵی هەبوو لە دەستەبەركردنی پاكوبێگەردی هەڵبژاردنەكان و قبووڵكردنی لەلایەن حزب و لایەنە كاریگەرەكانی پرۆسەی سیاسییەوە.

لای خۆیەوە تیمەكە ئامادەیی یۆنامی بۆ هاوكاریكردنی كۆمیسیۆنی باڵای سەربەخۆی ھەڵبژاردنەكانی عێراق دەربڕی لە پێناو سەركەوتنی پرۆسەی هەڵبژاردنی پەرلەمانی كوردستان .

جێگەی باسە وەفدەكەی نێردەی نەتەوە یەكگرتووەكان (یۆنامی) پێكهاتبوو لە  ئەمیر ئارەین سەرۆكی تیمی هاریكاری هەڵبژاردن و ئاسۆ كاكەی راوێژكاری تیم .

PUKMEDIA