شێخ جه‌عفه‌ر: پێشمه‌رگه‌ خاوه‌نی ده‌ستكه‌وته‌كانن

PUKMEDIA

کۆبوونەوەی وەفدێکی باڵای یەکێتی له‌گه‌ڵ ژماره‌یه‌كی زۆر له‌ تێكۆشه‌رانی هێزی یه‌ده‌كی پێشمه‌رگه‌ی كوردستان

لێپرسراوی ئه‌نجومه‌نی پاراستنی به‌رژه‌وه‌ندییه‌ باڵاكانی یه‌كێتیی نیشتمانیی كوردستان ستایشی رۆڵ و كاریگه‌ریی پێشمه‌رگه‌ قاره‌مانه‌كانی هێزی یه‌ده‌كی كردو پێی راگه‌یاندن: "ئێوه‌ی شه‌هیدی زیندوو كه‌ ئه‌وپه‌ڕ‌ی فیداكاریتان نواند، خاوه‌نی ده‌ستكه‌وته‌كانی پاش راپه‌ڕ‌ینن".

رۆژی شه‌ممه‌ 7ی ئه‌یلول، شێخ جه‌عفه‌ر شێخ مسته‌فا لێپرسراوی ئه‌نجومه‌نی پاراستنی به‌رژه‌وه‌ندییه‌ باڵاكانی یه‌كێتیی نیشتمانیی كوردستان و قوباد تاڵه‌بانی ئه‌ندامی مه‌كته‌بی سیاسی و لێپرسراوی مه‌كته‌بی سكرتاریه‌تی سه‌رۆك مام جه‌لال، له‌باره‌گای ئه‌نجومه‌ن، به‌ ئاماده‌بوونی وه‌ستا ره‌سوڵ لێپرسراوی مه‌ڵبه‌ندی رێكخستنی پێشمه‌رگه‌و سه‌عدی ئه‌حمه‌د پیره‌ وته‌بێژی یه‌كێتیی نیشتمانیی كوردستان و هه‌ڤاڵان مامۆستا جوامێر و جوتیار نوری، له‌گه‌ڵ ژماره‌یه‌كی زۆر له‌ تێكۆشه‌رانی هێزی یه‌ده‌كی پێشمه‌رگه‌ی كوردستان كۆبوونه‌وه‌.

پاشان، لێپرسراوی ئه‌نجومه‌ن، ته‌ئكیدی له‌سه‌ر هه‌ڵوێستی نه‌گۆڕ‌و مه‌بده‌ئیی سه‌رۆك و سه‌ركردایه‌تی یه‌كێتی كرده‌وه‌ سه‌باره‌ت به‌ زه‌روره‌تی یه‌كخستنی پێشمه‌رگه‌و دامه‌زراندنی سو‌پایه‌كی یه‌كگرتووی كورستان كرد كه‌ ئه‌ركی سه‌ره‌كی پاراستنی هه‌رێم بێت له‌هه‌ر هه‌ڕ‌ه‌شه‌ و مه‌ترسییه‌ك، دووپاتیشیكرده‌وه‌ كه‌ هێزو سوپای حزبی یه‌كێكه‌ له‌ هه‌ڕ‌ه‌شه‌كانی سه‌ر هه‌رێم.

دواتر قوباد تاڵه‌بانی ئه‌ندامی مه‌كته‌بی سیاسی سه‌رباری ده‌ربڕ‌ینی خۆشحاڵی خۆی سه‌باره‌ت به‌ دیداری له‌گه‌ڵ تێكۆشه‌رانی هێزی یه‌ده‌ك و ئاماژه‌دان به‌پێگه‌ی گرنگی ئه‌و هێزه‌ له‌ به‌رگریكردن له‌دامه‌زراوه‌كانی هه‌رێم، دواپێشهاته‌كانی بارودۆخی هه‌رێمی كوردستانی بۆ باسكردن و رۆڵی گه‌وره‌و كاریگه‌ری یه‌كێتی له‌و نێوه‌نده‌دا بۆ ئاماده‌بووان شیكرده‌وه‌.

قوباد تاڵه‌بانی جه‌ختیكرده‌وه‌:" ئه‌مڕ‌ۆ یه‌كێتی له‌هه‌موو كاتێكی تر زیاتر یه‌ك ده‌نگ و یه‌ك هه‌ڵوێست و یه‌ك وتاره‌، ئه‌وه‌ش بووه‌ته‌ مایه‌ی پته‌وتركردنی پێگه‌كه‌ی له‌سه‌ر هه‌ردوو ئاستی هه‌رێم و عیراق كه‌ سه‌ره‌نجام به‌ قازانج و به‌رژه‌وه‌ندی میلله‌تی كورد ده‌شكێته‌وه‌، سه‌ركه‌وتنه‌ یه‌ك له‌دوای یه‌كه‌كانی یه‌كێتی له‌موسڵ و كه‌ركوك و به‌غدای به‌به‌رجه‌سته‌بوونی ئه‌و یه‌كریزییه‌ی ناو یه‌كێتی له‌قه‌ڵه‌مدا، كه‌ ئومێد ده‌كرێت ئه‌و زنجیره‌ سه‌ركه‌وتنانه‌، ره‌نگدانه‌وه‌یان له‌هه‌ڵبژاردنی داهاتووی په‌رله‌مانی كوردستاندا هه‌بێت".

PUKMEDIA