شێخ جەعفەر: یەکێتی کار بۆ پەرلەمانێک دەکات شوێنی شەڕە قسە نەبێت

PUKMEDIA

شێخ جەعفەر شێخ مستەفا

شێخ جەعفەر شێخ مستەفا لێپرسراوی ئەنجومەنی پاراستنی بەرژەوەندییە باڵاكانی یەكێتیی نیشتمانیی كوردستان رایدەگەیەنێت:" یەکێتی کار بۆ هەڵبژاردنی پەرلەمانێکی بەهێز دەکات کە ئەندامەکانی رەنگدانەوەی ئازارو مەینەتی و داواکارییەکانی خەڵک بن، نەک پەرلەمانێک کە ببێتە شوێنی شەڕە جنێو و سوکایەتیکردن بەیەکتر".

لێپرسراوی ئەنجومەنی پاراستنی بەرژەوەندییە باڵاكانی یەكێتی لە میانی کۆبوونەوەیەکی جەماوەریدا لە گوندی "مچە کوێر"ی ناوچەی قەرەداغ رایگەیاند:"هەمیشە یەکێتی کاری بۆ یەکڕیزیی و تەبایی نێوان هێزو لایەنە سیاسییەکان کردووە، بەڵام لایەنی بەرانبەر وەکو پێویست بەدەم بانگەوازو هەوڵەکانی یەکێتییەوە نەدەهاتن، ئەوەش لاسەنگیی و دوورکەوتنەوەی لە رێبازی کوردایەتی دەهێنایەکایەوە".

" یەکێتی کار بۆ هەڵبژاردنی پەرلەمانێکی بەهێز دەکات کە ئەندامەکانی رەنگدانەوەی ئازارو مەینەتی و داواکارییەکانی خەڵک بن، نەک پەرلەمانێک کە ببێتە شوێنی شەڕە جنێو و سوکایەتیکردن بەیەکتر"، شێخ جەعفەر شێخ مستەفا وادەڵێت.

بەگوێرەی مەرسومی هەرێمی بڕیارە 20/10/2024 هەڵبژاردنی خولی شەشەمی پەرلەمانی کوردستان بکرێت کە کۆمسیۆنی باڵای سەربەخۆی هەڵبژاردنەکانی عیراق بەڕێوەیدەبات.

لێپرسراوی ئەنجومەنی پاراستنی بەرژەوەندییە باڵاكانی یەكێتی هانی ئامادەبووانی کۆبوونەوەی دا کە ژمارەیەکی زۆر لە کەسایەتی کۆمەڵایەتی و چین و توێژە جیاجیاکانی سنووری قەرەداخ و دەربەندیخان بوو، کە بەشداری کارای هەڵبژاردن بکەن و رایگەیاند: "یەکێتی کار بۆ  پەرلەمانێک دەکات کە کاری سەرەکیی پێکهێنانی حکومەتێکی خزمەتگوزاری ئەوتۆ بێت کە ئاوەدانی و خۆشگوزەرانی بۆ خەڵک دەستبەر بکات و جەماوەری ناڕازی کوردستان ئاشت بکاتەوە".

PUKMEDIA