وتەبێژی یەکێتی: ئەو کەسانەی لە ٣١ی ئابدا هێنرابوون بۆ هەولێر بیانی بوون

PUKMEDIA

سەعدی ئەحمەد پیرە، وتەبێژی یەکێتیی نیشتمانیی کوردستان

پاش کۆبونەوەی ئەمڕۆی ئەنجومەنی سەرکردایەتی یەکێتیی نیشتمانیی کوردستان لەهەولێر وتەبێژی یەکێتی لە کۆنگرەیەکی رۆژنامەوانیدا دەڵێت: "ئەنجومەنی سەرکردایەتی یەکێتیی نیشتمانیی کوردستان لەکۆبونەوەیدا باسی رەوشی هەرێم و قۆناغەکانی پێش هەڵبژاردن و چەندین پرسی گرنگی تر کرا".

سەعدی ئەحمەد پیرە وتەبێژی یەکێتیی نیشتمانیی کوردستان لە کۆنگرەیەکی رۆژنامەوانیدا رایگەیاند: "لەکۆبونەوەکەدا باروودۆخی هەرێمی کوردستان و قۆناغەکانی پێش هەڵبژاردن باسی لێکراوە و هاوکات تەوەرێکی گرنگی تری کۆبونەوەکە دواکەوتنی مووچەی مووچەخۆرانی هەرێم بوو، داواکرا تیمی یەکێتی لە حکومەت لەبەغدا کاربکەن بۆ چارەسەرکردنی، چونکە لەهەندێک شوێنەوە هەوڵدەدرێت کێشە بۆ مووچە دروستبکەن و تێکەڵ بە ململانێ سیاسییەکانی دەکەن، پێویستە بۆ پرسی مووچە هەرێم و بەغدا پابەندی بڕیارەکانی دادگای فیدراڵی بن".

"بەداخەوە وەک بینیمان ئەو کەسانەی لە یادی کارەساتی ٣١ی ئابدا هێنرابون بۆ خۆپیشاندان لە هەولێر، بیانیی بون و رونیشە هەندێ لەو رۆژنامانەی لەهەولێر دەردەچن پێشوەخت بڕیار لەسەر بابەتەکانیان دراوە"، سەعدی پیرە وای وت.

وتەبێژی یەکێتی ئەوەش دەڵێت: "ئێمە وەک یەکێتیی نیشتمانیی کوردستان پشتگیری هەر هەوڵێک دەکەین کە بۆچارەسەری کێشەکان بێت و داواش دەکەین بانگەشە و بەڕێوەچوونی پرۆسەی هەڵبژاردن هێمنانە بێت و هاووڵاتیان بتوانن لە رێگای دەنگەکانیانەوە داوای مافی خۆیان بکەن".

PUKMEDIA