لەكۆنفرانسی كوردانی قەفقازدا رۆڵی یەكێتی بەرزنرخێندرا

PUKMEDIA

بەشداری یەكێتی لەیەكەمین كۆنفرانسی كوردانی قەفقاز لە جۆرجیا

نەخشەڕێگەی یەكێتیی نشتیمانیی كوردستان، بۆ پاڵپشتیكردن و هاوكاریكردنی هەموو بەشەكانی كوردستان، لەپرسە نەتەوەیی و دیموكراسییەكان، لە یەكەمین كۆنفرانسی كوردانی قەفقاز لە تەبلیسی پایتەختی جۆرجیا پێشكەشكراو لەكۆنفرانسەكەدا رۆڵی یەكێتی لەئێستاو لەڕابردوودا بۆ هەرچوارپارچەی كوردستان بەرزنرخێنرا.

لە یەكەمین كۆنفرانسی كوردانی قەفقاز، سیاسەتی حەكیمانە و خەباتی سەرۆك مام جەلال، رێبەری رزگاریخوازی گەلی كورد، لە بەگەڕخستنی پەیوەندیی و دیپلۆماسییەكانی بۆ سەرخستنی بەرژەوەندی باڵاكانی دۆزی گەلی كورد لە باكور، رۆژهەڵات، باشوورو رۆژئاوا و كوردستانی سوور، بەرز نرخێنرا، هاوكات باس لە رۆڵی یەكێتیی نیشتمانیی كودستان، بە سەرۆكایەتی سەرۆك بافڵ جەلال تاڵەبانی لەئێستادا كرا بۆ لەئەستۆگرتنی ئەركە قورسە نەتەوەیی و نیشتیمانییەكان، لە پاڵپشتیكردن و هاوكاریكردنی خوشك و براكانمان لە هەموو بەشەكانی كوردستان.

لەو بارەیەشەوە سالار سەرحەد خەلیفە ئەندامی سەركردایەتی و لێپرسراوی بەشی پەیوەندییە كوردستانییەكان بەوێبسایتی رەسمی یەكێتیی نیشتمانیی كوردستان PUKMEDIA ی راگەیاند: "‎لەكۆنفرانسەكەدا 26 پانێڵ‌و گوتار  لەبارەی بارودۆخی گشتیی كوردستان‌و پەیوەندی كوردانی قەفقاز بەپارچەكانی دیكەی كوردستانەوە پێشكەش كرا".

راشیگەیاند: "لەكونفرانسەكەدا وتاری یەكێتیی نیشتمانیی كوردستانم خوێندەوەو گەشبینی خۆمان نیشاندا سەرباری هەموو ئەو ئاستەنگیانەی بەرۆكی دۆزی كوردی گرتووە، بەڵام هێشتا هەنگاوەكان زیندوون، بۆ كۆكردنەوەی رۆشنبیران و لایەنەكانی كورد، بەتایبەت رۆشنبیرانی كوردی تاراوگە و كوردانی قەفقاز، بۆ گفتوگۆكردن لەسەر ئەو پرس و تەنگەژەو ئاڵانگارییانەی، كە رووبەڕووی پرسی كورد بوونەتەوە، تاوەكو لەو رێگەیەوە هەوڵبدرێت چارەسەریان بۆ بدۆزرێتەوە".

جێی ئاماژەیە، وەفدی یەكیێتی نشتیمانیی كوردستان، بەسەرپەرشتی سالار سەرحەد خەلیفە یونس، ئەندامی سەركردایەتی و لێپرسراوی پەیوەندییە كوردستانییەكان، لەجۆرجیا، بەشداریكرد لە یەكەمین كۆنفرانسی كوردانی قەفقاز، كە بە بەشداری 70 میوان لە ھەر چوارپارچەی كوردستان و لە 16 وڵاتی جیهانەوە بەڕێوەچوو.

وەفدێکی یەکێتی بەشداری یەکەمین کۆنفرانسی کوردانی قەفقاز دەکات

پەرلەمانی جۆرجیا خواستی پتەوكردنی پەیوەندییەكانێتی لەگەڵ یەكێتی


PUKMEDIA