وه‌ڵامێك بۆ راگه‌یاندنی پارتی؛ "تیشكی خۆر به‌بێژنگ ناگیرێت"

PUKMEDIA

مەکتەبی راگەیاندن و هۆشیاری

بۆردی راگەیاندنی یەکێتیی وەڵامی راگەیاندنی پارتی دەداتەوەو لە راگەیەندراوێکدا رایدەگەیەنێت: "پەیامەکەی میدیای پارتی بەلای ئێمە و ئێزدییەکانی شەنگالەوە هیچ حسابێکی بۆ ناکرێت و پەندێکی پێشینان هەیە دەڵێت "بەری  خۆر بە بێژنگ ناگیرێت".


بۆردی راگەیاندنی یەکێتیی نیشتمانیی كوردستان لە پەیامێکدا وەڵامی راگەیاندنی پارتی دیموكراتی كوردستان دەداتەوە، کەسەبارەت بە ساڵیادی داگیرکردنی شەنگال بڵاویکردبۆوە.

دەقی پەیامەکە...

پەیامەکەی مەکتەبی سیاسی یەکێتیی نیشتمانیی کوردستان تایبەت بەساڵیادی جینۆسایدکردنی ئێزدییەکانی شەنگال، هەمان ئەو رەخنە و قسانەن، کە ساڵانە لەلایەن هەزاران هاووڵاتی ئێزدییەوە دەکرێت و ئۆباڵی چۆڵكردن و رادەستكردنی خەڵكی سڤیلی شەنگال دەخەنە ئەستۆی پارتیەوە، كە دەرەنجام بەهۆی ئەو راکردنەوە هەزاران هاووڵانی ئێزدی لەلایەن تیرۆرستانی داعشەوە كۆمەڵكوژكران . ئەگەر بتانەوێت نەک هەر قسەی هاووڵاتیانی ئێزدی، بەڵکو قسەی چەندین کەس لە کادیرانی پارتی کە خۆیان سەر بە ئایینی ئێزدین بڵاودەکەینەوە، كە  لەکاتی  فەرمان و کارەساتی شەنگال بەدەنگێکی بەرزەوە دەیانووت "پارتی  ئێمەی فرۆشت" . لێدوان و قسەی قاسم شەشۆی فەرماندەی باڵای پارتی هەیە کە نزیکەی ساڵێک لەسەر شاخی شەنگال بەهۆی كەمتەرخەمییەکەی حزبەكەیەوە بایکۆتی پارتی کردبوو .

بۆیە پەیامەکەی میدیای پارتی بەلای ئێمە و ئێزدییەکانی شەنگالەوە هیچ حسابێکی بۆ ناکرێت و پەندێکی پێشینان هەیە دەڵێت "بەری  خۆر بە بێژنگ ناگیرێت".

بۆردی راگەیاندنی یەکێتیی نیشتمانیی کوردستان

PUKMEDIA