د. بەرهەم ساڵح: پێویستە بەرەنگاری بیری توندڕەوی ببینەوە

Belfer Center for Science and International Affairs

د. بەرهەم ساڵح سەرۆککۆماری پێشووی عیراق

سەرۆککۆماری پێشووی عیراق لە ساڵیادی جینۆسایدکردنی ئێزدییەکاندا رایدەگەیەنێت: "پاشماوەی بیری داعشی لە ئێستاشدا مەترسیەكی گەورەیە و ناكرێ پشتگوێی بخەین، پێویستە لەناو ئایینی پیرۆز و دامەزراوەكانیدا؛ بەرەنگاری توندڕەوی و هزری تەكفیری ببینەوە و پارێزگاری لە چەمكی دەستووری مەدەنی بکەین".

هەزاران ئێزدی بێ ماڵ و حاڵن

د. بەرهەم ساڵح سەرۆککۆماری پێشووی عیراق لە وتارێکدا کە لە بەشی بیروڕای PUKMEDIA بڵاوکراوەتەوە رایدەگەیەنێت: "تا ئێستاش بە هەزاران ئێزدی بێ ماڵ و حاڵ لە كەمپی ئاوارەکاندا دوور لە زێدی خۆیان دەژین، و چارەنووسی زیاتر لە دوو هەزار ژن و کچی بە کەنیزەکراوی رفێنراو بە نادیاری ماوەتەوە،  شەنگالیش تا ئێستا سەقامگیری و ئاوەدانكردنەوە بۆ بەدینەهاتۆتەوە".

"ئامانجی تیرۆریستان كۆمەڵكوژی و سڕینەوەی ئێزدیەكان بوو، بەڵام خۆڕاگری گەلەكەمان و قوربانیدانی هێزە ئەمنیەكانمان و پشتیوانی كۆمەڵگەی نێودەوڵەتی پلانی تیرۆریستەكانی هەڵوەشاندەوە، توندڕەوەكان بە پاساوی لێكدانەوەی تەکفیر و نابوتی بە ناو ئایین، کە ریشەی لەناو ئەخلاقی رەگەزپەرستی و جیاکاری رەگەزییە، ئەم تاوانەیەیان ئەنجام دا، پێویستە ئەوەمان لە یاد نەچێت کە ئەم تاوانەی روویدا لە سایەی بەرژەوەندی هەندێ هێزو وڵاتدا بوو کەلەگەڵ تیرۆرو تەكفیر و توندڕەویدا یەکانگیربو،  هەورەک چۆن لە ئەنجامی كەمتەرخەمی دەزگای ئەمنی و حوکمڕانی بوو لەو ناوچانە کە هەرەسیان هێنا لە بەرگری كردن لە ئاواییەكانی ئێزدیەكان، ئەم هەرەس هێنانە بە جۆرێک بوو تەنانەت لە كاتی هێرشی داعشدا؛ خەڵكی ئاسایی و لە نێویاندا ژمارەیەکی زۆر ژن و كچ و منداڵ بۆ وەحشیەتی داعشەکان بە جێهێڵدران"، د. بەرهەم وادەڵێت.

ئێزدییەکان پێکهاتەی رەسەنی ئەم نیشتمانەن

سەرۆککۆماری پێشووی عیراق ئاماژەی بەوەشداوە: "ئێزدیەكان پێکهاتەی رەسەن و گوزارشتن لە كولتوری جوانی رەنگاو رەنگی ئەم نیشتمانە، بۆیە لەگەڵ یادی دە ساڵەی کارەساتی ئەواندا و یادی ئەو مەرگە ساتانەش دەكەینەوە كە بەسەر تەواوی پێكهاتەكانی دیکەی گەلەكەماندا هاتووە، هەر لە قوربانیانی گۆڕە بە كۆمەڵەكان و ئەنفال و كیمیا بارانكردنی هەڵەبجەوە هەتا قوربانیانی دەستی تیرۆر".

"پێویستە دان بەوەدا بنێین كە پاشماوەی بیری داعشی لە ئێستاشدا مەترسیەكی گەورەیە و ناكرێ پشتگوێی بخەین، دووپاتی ئەوە دەكەینەوە كە پێویستە لەناو ئایینی پیرۆز و دامەزراوەكانیدا؛ بەرەنگاری توندڕەوی و هزری تەكفیری ببینەوە و پارێزگاری لە چەمكی دەستووری مەدەنی بکەین كە لەڕاستیدا پارێزگارییە لە شوناسی نیشتمانی و ڕەنگاڵەی کۆمەڵگا، ئەو شوناس و دەستورەی کە بەکارهێنانی ئایین و سەپاندنی بۆ مەبەستی سیاسی رەتدەكاتەوە"، د. بەرهەم ساڵح وادەڵێت.
PUKMEDIA