هەڵبژاردنی پەرلەمانی کوردستان بە 69 ملیار دینار بەڕێوەدەچێت

PUKMEDIA

لۆگۆی کۆمسیۆنی باڵای سەربەخۆی هەڵبژاردنەکان

کۆمسیۆنی باڵای سەربەخۆی هەڵبژاردنەکانی عیراق 69 ملیار دیناری بۆ هەڵبژاردنی خولی شەشەمی پەرلەمانی کوردستان تەرخانکردووە، وتەبێژی کۆمسیۆنەکەش رایدەگەیەنێت: "ئەگەر پێویست بکات گۆڕانکاری بەسەر بودجەی تەرخانکراودا دێت".

نزیکەی سێ ملیۆن دەنگدەر ناویان تۆمارکردووە

جومانە غەلای وتەبێژی کۆمسیۆنی باڵای سەربەخۆی هەڵبژاردنەکانی عیراق بە وێبسایتی رەسمی یەکێتیی نیشتمانیی کوردستان PUKMEDIA ی راگەیاند: "ئەو چوار جۆر وەرەقە نموونەیەی کە ئەنجومەنی کۆمیسیاران پەسەندیکردووە، بۆ دەنگدانی گشتییە لە پارێزگاکانی هەولێر، سلێمانی، دهۆک، هەڵەبجە و هەر پارێزگایەک وەرەقەی تایبەت بە خۆی هەیە، ھاوکات کۆمسیاران نمونەی سەرەتایی وەرەقەی دەنگدانی تایبەتیشیان پەسەندکرد".

"بۆ ھەڵبژاردنی خولی شەشەمی پەرلەمانی کوردستان، دوو ملیۆن و 899 ھەزار و 578 کەس مافی دەنگدانیان ھەیە، بەهۆی سڕینەوەی ناوی مردووان و دووبارەکان ژمارەکە کەمیکردووە، هەروەها بۆ هەڵبژاردنەکە حەوت ھەزار و 67 بنکەی دەنگدان و ھەزار و 431 ناوەندی دەنگدان لە پارێزگاکانی ھەرێم دادەندرێن"، وتەبێژی کۆمسیۆن وای وت.

جومانە غەلای ئاماژەی بەوەشدا: "بۆ هەڵبژاردنی خولی شەشەمی پەرلەمانی کوردستان 69 ملیار دینار تەرخانکراوە و ئەگەر پێویست بکات گۆڕانکاری بەسەر بودجەی تەرخانکراودا دێت".

"لە رۆژی 29ـی 7ـی 2024 کۆمسیۆن ناوی کاندیدەکانی ئاڕاستەی لایەنە پەیوەندیدارەکان کردووە و پێویستە لایەنە پەیوەندیدارەکانیش لە ماوەی 15 رۆژدا وەڵامی کۆمسیۆن بدەنەوە"، وتەبێژی کۆمسیۆن وای وت.

139 لیست ناویان تۆمارکردووە

بۆ هەڵبژاردنی خولی شەشەمی پەرلەمانی کوردستان کە بڕیارە لە رۆژی 20ـی 10ـی 2024 بەڕێوەبچێت، 139 لیست لە نێوانیاندا 2 هاوپەیمانی و 13 حزب ناویان تۆمارکردووە بۆ بەشداریکردن لە هەڵبژاردنەکەدا.

هەروەها بۆ هەڵبژاردنەکە 124 کاندید ناوی خۆیان تۆمارکردووە، بەجۆرێک 85 کاندیدی سەربەخۆ و 20 کاندیدی تورکمان و 19 کاندیدی مەسیحی، کاندیدە تورکمانەکان بەمشێوەیە بەسەر بازنەکاندا دابەشبوون، هەولێر 14 کاندید و سلێمانی 6 کاندید، هەروەها کاندیدە مەسیحیەکان بەمشێوەیە بەسەر بازنەکانی هەڵبژاردندا دابەشبوون، هەولێر 7 کاندید و سلێمانی 4 کاندید و دهۆک 8 کاندید.
PUKMEDIA