ئەندامێکی لیژنەی دارایی: پارەی خانەنشینانی هەرێم دەبێتە داهاتی کۆتایی بۆ عیراق

PUKMEDIA

دراوی 50 هەزار دیناری عیراقی

وردبینی لیستی مووچەی مووچەخۆرانی هەرێم بۆ مانگی حەوت لەلایەن دارایی عیراقەوە دەستیپێکردووە و ئەندامێکی لیژنەی داراییش دەڵێت: " لەگەڵ تەواوبوونی وردبینی بڕیاری خەرجکردنی مووچە دەدرێت". سەبارەت بە گەڕانەوەی پارەی سندوقی خانەنشینیش بۆ عیراق ئاماژە بەوەدەکات: " پارەی خانەنشینانی هەرێم دەبێتە داهاتی کۆتایی بۆ وەزارەتی دارایی عیراق کە مانگانە 14 ملیار دینار دەبێت".

دارایی عیراق دەستی بە وردبینی کردووە

د. نەرمین مەعروف ئەندامی لیژنەی دارایی لە ئەنجومەنی نوێنەرانی عیراق بە وێبسایتی رەسمی یەکێتیی نیشتمانیی کوردستان PUKMEDIA ی راگەیاند: "لەگەڵ ناردنی لیستی مووچەی مانگی حەوتی مووچەخۆرانی هەرێم بۆ بەغدا، دارایی عیراق دەست بە وردبینی لیستی مووچە کردووە و لەگەڵ تەواوبوونی وردبینی بڕیاری خەرجکردنی مووچە دەدرێت".

"نەک تەنها بۆ مووچەخۆرانی هەرێم، بەڵکو ئەرکی وەزارەتی داراییە مانگانە وردبینی لە لیستی مووچەی مووچەخۆرانی عیراقیشدا بکات و پاش وردبینی بڕیاری خەرجکردنی دەدرێت و ئەو گرفتانەی لە لیستی مووچەخۆرانی هەرێمدا هەیە چارەسەربکرێت بە یەک میکانیزم لەگەڵ مووچەخۆرانی عیراق مانگانە مووچەکانیان پیدەدرێت"، د. نەرمین مەعروف وای وت.

لە هەرێمەوە 14 ملیار دینار وەک لێبڕینی خانەنشینی گەڕاوەتەوە بۆ عیراق

حکومەتی هەرێم سندوقی خانەنشینی نییە، بەڵام لێبڕینی خانەنشینەکانی کە مانگانە دەگاتە 14 ملیاد دینار، گەڕاوەتەوە بۆ دارایی عیراق.

ئەندامەکەی لیژنەی دارایی لە ئەنجومەنی نوێنەران ئاماژەی بەوەشدا: "راستە حکومەتی هەرێمی کوردستان سندوقی خانەنشینی نییە و ئەو لێبڕینەی لە خانەنشینان دەبڕێت کە لە ئێستادا 7٪ـە، نەچووەتە سندوقی خانەنشی هەرێمەوە، بەڵام بووەتە داهاتێکی کۆتایی بۆ وەزارەتی دارایی عیراق کە مانگانە دەکاتە 14 ملیار دینار".

"مووچەی خانەنشینی هەرێمی کوردستان بەشێکە لە تەرخانکراوی پارە بۆ هەرێمی کوردستان و لە پشکی هەرێم دەبڕدرێت کە لەڕاستیدا ئەم سیستمەش پێویستی بە راستکردنەوە هەیە و گفتوگۆی زۆر هەڵدەگرێت لەنێوان هەردوو حکومەتدا، ئەگەر حکومەتی عیراق داوای پارەی خانەنشینانی هەرێمیش بکات دەچێتە چوارچێوەی پاکتاوی دارایی لەنێوان هەردوو حکومەتدا"، د. نەرمین مەعروف وای وت.

PUKMEDIA