سەرۆكکۆمار: عیراق سەقامگیرە و پشتیوانی لە مافەکانی مرۆڤ دەکەین

سەرۆکایەتی کۆماری عیراق

کۆبوونەوەی سەرۆککۆمار و چەند نێردەیەکی نێودەوڵەتی

د.لەتیف جەمال رەشید سەرۆكکۆماری عیراق پێشوازیکرد لە کریستین هوهمان باڵیۆزی ئەڵمانیای فیدراڵی و لاتیتیا ڤان ئاش هەڵسوڕێنەری کاروباری باڵیۆزخانەی شانشینی هۆڵەندا و ماری ترێزە هیلال هەڵسوڕێنەری کاروباری باڵیۆزخانەی کەنەدا و ئەنگۆس کلاریکسۆن راوێژکاری سیاسیی باڵیۆزخانەی بەریتانیا.

دیدارەکە ئەمڕۆ سێشەممە 23-7-2024 لە کۆشکی بەغداد بەڕێوەچووە، بەپێی راگەیەندراوێکی سەرۆکایەتی کۆمار کە وێنەیەکی دەست PUKMEDIA کەوتووە، سەرۆكکۆمار ئاماژەی بەوەداوە: "حکومەتی عیراق کاردەکات بۆ دانانی پلانێکی گشتگیر لەپێناو سەرلەنوێ بەگەڕخستنەوەی کارگەکان و راکێشانی وەبەرهێنەران، چونکە دەرفەتی گونجاو هەیە بۆ کۆمپانیاکان تا وەبەرهێنان لە عیراقدا بکەن و پرۆژەی پەرەپێدان جێبەجێ بکەن، بە تایبەت کە لەئێستادا سەقامگیریی سیاسی و ئاسایش و ئابوری لە عیراقدا هەیە".

بەپێێ راگەیەندراوەکە، سەرۆكکۆمار هەوڵەکانی عیراقی لەبوارەکانی بەرەنگاربونەوەی توندوتیژی دژبە ژنان و منداڵان و دۆزینەوەی چارەسەر بۆ کێشەی ئاوارەکان و پشتیوانیکردن لە مافەکانی مرۆڤ بەگشتی و کاراکردنی هاریکاری هاوبەشی نێودەوڵەتی دووپاتکردووەتەوە و ئاماژەی بەوەشکردووە: "عیراق بەشێوەیەکی نایاب پشتیوانی لە مافەکانی مرۆڤ دەکات و گرنگی بە پرەنسیپەکانی دەدات و وەك بنەمایەكیش بۆ یاسادانان و رێکخستنی کۆمەڵایەتی، پشتیان پێدەبەستێت، لەم بوارەشدا لەلایەن سەرۆکایەتی کۆمار و لایەنە پەیوەندیدارەکانەوە بایەخ بە سەرجەم سکاڵاکان دەدرێت و بەدواداچونیان بۆ دەکرێت".

لای خۆشیانەوە نوێنەرانی نێردە دیپلۆماسییەکان خۆشحاڵی خۆیان بەو پێشکەوتنانە دەربڕیوە کە لە عیراقدا بەدیهاتون و جەختیان لە پەرۆشی وڵاتەکانیان کردووەتەوە بۆ پشتیوانیکردن لە سەقامگیریی عیراق و فراوانکردنی ئاسۆکانی هاریکاری لەبوارە جیاجیاکاندا.
PUKMEDIA