یەکێتی و شەش حزبی کوردستانی: بەیەکڕیزی خزمەت بکەین

PUKMEDIA

وەفدی یەکێتی و شەش حزبە کوردستانییەکە

یەکێتیی نیشتمانیی کوردستان و شەش حزبی کوردستانی کۆدەبنەوەو چەند پرسێکی گرنگ تاوتوێ دەکەن و ئاماژە بەوەش دەکەن: "بەیەکڕیزی و تەبایی دەتوانین باشتر خزمەتی گەلی کوردستان بکەین".

لە راگەیەندراوێکدا کە کۆپییەکی بۆ وێبسایتی رەسمی یەکێتیی نیشتمانیی کوردستان PUKMEDIA نێردراوە، ئاماژە بەوەکراوە، سەرلەبەیانی ئەمڕۆ 15-7-2024 وەفدێکی یەکێتی بەسەرۆکایەتی رزگار حاجی حەمە ئەندامی مەکتەبی سیاسی و سالار لالە سەرحەد و لەتیف نێروەیی ئەندامانی سەرکردایەتی پێشوازییان کرد لە سەرۆک و سەرکردەی شەش حزبی کوردستانی و لەکۆبونەوەیەکدا دۆخی ئێستای هەرێمی کوردستان و هەوڵەکانی پێکهێنانی ئیدارەی کەرکوک و نەینەوا و یەکڕیزی هێزەکانیان تاوتوێکرد.

رزگار حاجی حەمە  ئەندامی مەکتەبی سیاسی رایگەیاند: "هەمیشە لەگەڵ یەکڕیزی و تەبایی و رێکخستنی ناوماڵی کورد بوین و هەموومان پێکەوە دەتوانین باشتر خزمەتی گەلی کوردستان بکەین و دەستکەوتەکانی هەرێم بپارێزین".

لەلایەکی ترەوە سەرۆکی هەر شەش حزبەکە پەرەپێدانی پەیوەندییەکانیان لەگەڵ یەکێتی و پاراستنی یەکڕیزی و تەبایی نێوان لایەنەکان دووپاتکردەوە.

وەفدی شەش حزبە کوردستانییەکە بریتیبون لە، (بزوتنەوەی چاکسازی نیشتمانی کوردستان، پارتی نەوەی کوردستان، بزوتنەوەی رزگاری دیموکراتی کوردستان، پارتی سەوزی کوردستان، بزوتنەوەی ئاشتیخوازان، حزبی پیشکەوتوخوازی دیموکراتی کوردستان).

PUKMEDIA