به‌غدا ده‌ستی به‌هه‌نگاوه‌كانی هاوتاكردنی مووچه‌ی خانه‌نشینانی هه‌رێم كرد

PUKMEDIA

دیداری د. بڕیار رەشید

بڕ‌یاره‌ له‌ماوه‌ی 60 رۆژدا ئه‌و لیژنه‌یه‌ی دیارییكراوه‌ بۆ هاوتاكردنی مووچه‌ی خانه‌نشینانی هه‌رێم له‌گه‌ڵ عیراق كاره‌كانی ته‌واو بكات و ئه‌ندامێكی ئه‌نجومه‌نی نوێنه‌رانیش ده‌ڵێت: "ده‌سته‌ی خانه‌نشینی عیراق بڕ‌یاره‌كه‌ی دادگایی فیدڕ‌اڵی بۆ هاوتاكردنی موچه‌ی خانه‌نشینانی هه‌رێم له‌گه‌ڵ عیراق جێبه‌جێده‌كه‌ن".


د. بڕ‌یار ڕ‌ه‌شید ئه‌ندامی ئه‌نجومه‌نی نوێنه‌رانی عیراق به‌وێبسایتی ره‌سمی یه‌كێتیی نیشتمانیی كوردستان PUKMEDIA ی راگه‌یاند: "له‌گه‌ڵ ماهیر حسێن سه‌رۆكی ده‌سته‌ی خانه‌نشینی عیراق گفتوگۆمان كرد له‌سه‌ر بڕ‌یاره‌كه‌ی دادگای فیدڕ‌اڵی كه‌ تایبه‌ته‌ به‌ یه‌كخستنه‌وه‌ی مووچه‌ی خانه‌نشینانی هه‌رێمی كوردستان و هاوتاكردنی به‌ خانه‌نشینانی حكومه‌تی فیدڕ‌اڵ".

"له‌ئێستادا لیژنه‌یه‌كی هاوبه‌ش دروستكراوه‌ كه‌ نوێنه‌رایه‌تی هه‌ریه‌ك له‌ده‌سته‌ی خانه‌نشینی هه‌رێم و وه‌زاره‌تی كار و نوێنه‌رایه‌تی حكومه‌تی تێدایه‌، لیژنه‌كه‌ به‌بڕ‌یاری سه‌رۆك وه‌زیرانی عیراق ده‌ستبه‌كاربوون بۆ دیاریكردنی رێكارێك بۆ جێبه‌جێكردنی بڕ‌یاری دادگایی فیدڕ‌اڵی، بڕ‌یار وایه‌ لیژنه‌كه‌ له‌ماوه‌ی ٦٠ ڕ‌ۆژدا بگاته‌ ئه‌نجام"، د.بڕیار واده‌ڵێت.

ئه‌وه‌شی خسته‌ڕوو: "سه‌رۆكی ده‌سته‌ی خانه‌نشینی عیراق به‌ڵێنیدا كه‌هاوكار و ئاسان كاری ته‌واو و به‌په‌له‌ بۆ بڕیاره‌كه‌ی دادگای فیدراڵی له‌باره‌ی هاوتاكردنی مووچه‌ی خانه‌نشینانی هه‌رێم له‌عیراق بكات".

PUKMEDIA