مووچەی مانگی شەش دابەشدەکرێت

PUKMEDIA

دیناری عیراقی

وەزارەتی دارایی لیستی دابەشکردنی مووچەی مانگی شەشی بڵاوکردەوە و بەپێی خشتەکەش لەماوەی دوو رۆژدا مووچەی سەرجەم ئەو وەزارەتانە دابەش دەکرێت کە لەلایەن بەغداوە مووچەکانیان نێردراوە.

بەپێی راگەیەندراوێکی وەزارەتی دارایی و ئابووری حکومەتی هەرێمی کوردستان کە وێنەیەکی دەست PUKMEDIA کەوتووە، تێیدا هاتووە: "لە رۆژانی چوارشەممە و پێنجشەممە 10 و 11ـی 7ـی 2024 مووچەی مانگی شەشی سەرجەم ئەو وەزارەتانە دابەشدەکرێن کە مووچەکانیان لەلایەن بەغداوە نێردراوە".

لە راگەیەندراوەکەشدا هاتووە: "وەزارەتی کارەباو سەرۆکایەتی پەرلەمان لەخشتەکەدا نییە، لەبەرئەوەی تەمویلەکەیان لەبەغداوە نەهاتووە، لەگەڵ وەزارەتی دارایی عیراق لەسەر هێڵین بۆ چارەسەرکردنی ئەو گرفتەی دروستبووە".

بەپێی زانیارییەکانی PUKMEDIA تا ئێستا حکومەتی فیردراڵ بە دوو جار بڕی 653 ملیار و 365 ملیۆن 531 هەزار دیناری بۆ وەزارەتی دارایی حکومەتی هەرێم ناردووە، پێشتریش کەسوکاری شەهیدان و ئەنفالکراوان و زیندانیانی سیاسی و خاوەن پێداویستیە تایبەتەکان و خانەنشینانی شارستانی و سەربازی لە رۆژی 6ـی 7ـی 2024 مووچەیان وەرگرت، سبەینێش سەرجەم ئەو وەزارەتانە مووچە وەردەگرن کە لە بەغداوە مووچەکانیان نێردراوە.

دابەشکردنی مووچەی مانگی شەشی مووچەخۆرانی مەدەنی لەکاتێکدایە کە بەشێک لە هێزە ئەمنییەکان مووچەی مانگی پێنج و شەشیان وەرنەگرتووە، بەجۆرێک لە ماوەی 92 رۆژدا تەنها یەک مووچەیان وەرگرتووە، لە ئێستاشدا چارەنووسی مووچەی مانگەکانی پێنج و شەشی بەشێک لە هێزە ئەمنییەکان نادیارە.
PUKMEDIA

خشتەی دابەشکردنی مووچەی مانگی شەش