عیراق زیاتر لە 421 ملیار دیناری بۆ مووچە نارد

PUKMEDIA

دراوی 50 هەزار دیناری عیراقی

کەمێک پێش ئێستا حکومەتی عیراق زیاتر لە 421 ملیار دیناری وەک بەشێک لە شایستەی مووچە بۆ هەرێم نارد.

وەزارەتی دارایی و ئابووری حکومەتی هەرێمی کوردستان لە راگەیەندراوێکدا کە کۆپییەکی بۆ PUKMEDIA نێردراوە ئاماژە بەوەدەکات: ئەمڕۆ دارایی عیراق بڕی ٤٢١ ملیارو ٧٦٠ ملیۆن دینار خرایە سەر هەژماری بانکی وەزارەتی دارایی هەرێم".

"ئەو بڕە پارەیە وەک بەشێک لەشایستەی مووچەی مانگی حوزەیرانی فەرمانبەرانی شارستانی هەرێمی کوردستان خراوەتە سەر هەژماری بانکی وەزارەتی دارایی و ئابوری لە لقی هەولێری بانکی ناوەندی عیراق"، لە راگەیەندراوەکەدا هاتووە.

ئەمەش لەکاتێکدایە پێشتر دارایی عیراق بڕی 231 ملیار و 605 ملیۆن و 531 هەزاری بۆ مووچەی مانگی شەشی کەسوکاری شەهیدان و ئەنفالکراوان و زیندانیانی سیاسی و خاوەن پێداویستییە تایبەتەکان و خانەنشینانی شارستانی و سەربازی ناردبوو، کە تا ئێستا بە کۆی گشتی 653 ملیار و 365 ملیۆن 531 هەزار دیناری وەک مووچەی مانگی شەش بۆ دارایی هەرێم ناردووە.
PUKMEDIA