ئەندامێکی فراکسیۆنی یەکێتی: پشتیوانی خانەنشینان بووین بۆ هاوتاکردنی مووچەکانیان

PUKMEDIA

کۆنگرەی رۆژنامەوانی د. بڕیار رەشید

دوای ساڵێک و هەشت مانگ، حکومەتی هەرێم بڕیارەکەی دادگای فیدراڵی لەبارەی هاوتاکردنی مووچەی خانەنشینانی هەرێم لەگەڵ عیراق پەسەندکرد، ئەندامێکی ئەنجومەنی نوێنەرانی عیراقیش دەڵێت: "لەگەڵ بەردەوامی فشارەکانی فراکسیۆنی یەکێتی لە ئەنجومەنی نوێنەرانی عیراق، بەڵام حکومەتی هەرێم کەمتەرخەم بووە لە جێبەجێکردنی بڕیارەکەی دادگای فیدراڵی و پێویست بوو زووتر هاوتاکردنی مووچەی خانەنشینانی پەسەند بکردایە، چونکە بڕیارەکەی دادگای فیدراڵی لە بەرژەوەندی خانەنشینانی هەرێم بوو".

حکومەتی هەرێم کەمتەرخەم بووە

د. بڕیار رەشید ئەندامی ئەنجومەنی نوێنەرانی عیراق بە وێبسایتی رەسمی یەکێتیی نیشتمانیی کوردستان PUKMEDIA ی راگەیاند: "حکومەتی هەرێم کەمتەرخەم بووە لە جێبەجێکردنی بڕیاری دادگای فیدراڵی لەبارەی هاوتاکردنی مووچەی خانەنشینانی هەرێم لەگەڵ عیراق کە لە سوودی خانەنشینانی هەرێم بووە".

"دوای ساڵێک و هەشت مانگ، ئەنجومەنی وەزیرانی هەرێم بڕیاری دادگای فیدراڵی لەبارەی هاوتاکردنی مووچەی خانەنشینانی هەرێم لەگەڵ عیراق خستە بواری جێبەجێکردنەوە و پێویستە لەماوەیەکی نزیکدا وەزارەتی دارایی هەرێم لیستی مووچەی خانەنشینان بەو مووچەیەی کە شایستەیانە ئاڕاستەی وەزارەتی دارایی عیراق بکات"، د. بڕیار رەشید وای وت.

فراکسیۆنی یەکێتی داکۆکیکاری خانەنشینان بووە

فراکسیۆنی یەکێتی لە بەغدا هەمیشە پشتیوان و داکۆکیکاری مافی خانەنشینانی هەرێم بووە و داوایکردووە یاسای خانەنشینی یەکگرتووی عیراق لە هەرێم جێبەجێ بکرێت، چونکە لە بەرژەوەندی خانەنشینانە.

د. بڕیار رەشید ئاماژەی بەوەدا: "خانەنشینانی هەرێم، بەراورد بە خانەنشینانی عیراق مووچەکانیان زۆر کەمترەو بڕیارەکەی دادگای فیدراڵی ئەو نایەکسانییە لە مووچەی خانەنشیناندا ناهێڵیت، کە بێگومان فراکسیۆنی یەکێتی لە ئەنجومەنی نوێنەران لەبارەی هاوتاکردنی مووچەی خانەنشینانەوە هەوڵی زۆری داوە و دەنگی خانەنشینانی هەرێمی گەیاندووەتە بەغدا".

"وەک ئەندامی فراکسیۆنی یەکێتی لە ئەنجومەنی نوێنەرانی عیراق، تەنها لە ئەمساڵدا لە رۆژانی 7ـی 1ـی 2024 و 18ـی 3ـی 2024 و 3ـی 7ـی 2024 دا لەگەڵ نوێنەرانی خانەنشینان کۆبوومەتەوە و پشتیوانیمان لە داوا رەواکانیان کردووە، تەنانەت چەند جارێک لە هەرێم و لە بەغدا کۆنگرەی رۆژنامەوانیمان ئەنجامداوە و پشتیوانی فراکسیۆنەکەمان بۆ داوا رەواکانیان دووپات کردووتەوە، ئەمە جگە لەوەی بەردەوام دادگای فیدراڵیمان لە جێبەجێنەکردنی ئەو بڕیارە ئاگادار کردووەتەوە و فشارەکانیشمان بۆسەر حکومەتی هەرێم بەردەوام بووە".

دادگای فیدراڵی یاسای خانەنشینی هەرێمی رەتکردەوە

پێشتر ژمارەیەک خانەنشین بە نوێنەرایەتی سەرجەم خانەنشینانی هەرێمی کوردستان لە دادگای فیدراڵی سکاڵایان لەسەر یاسای ژمارە 27ـی ساڵی 2006 تۆمارکرد و داوایانکرد یاسای خانەنشینی یەکگرتووی عیراق جێبەجێ بکرێت، بۆ ئەمەش فراکسیۆنی یەکێتی لە ئەنجومەنی نوێنەرانی عیراق پشتیوانی لە داوا رەواکەیان کرد و هەوڵەکانی بەردەوام بوو بۆ جێبەجێکردنی یاساکە لە هەرێمی کوردستانیش.

لەم روانگەیەشەوە دادگای فیدراڵی لە کۆبوونەوەی رۆژی 23ـی 11ـی 2022 دا بە زۆرینەی دەنگی ئەندامانی، بڕیاریدا بە رەتکردنەوەی جێبەجێکردنی یاسای ژمارە 27ـی ساڵی 2006ـی هەرێم و جێبەجێکردنی یاسای ژمارە 9ـی ساڵی 2014ـی یاسای خانەنشینی یەکگرتووی عیراقی هەموارکراو.

لە دوای ساڵێک و هەشت مانگ لە بڕیارەکەی دادگای فیدراڵی، ئەنجومەنی وەزیرانی هەرێم رۆژ ی 4ـی 7ـی 2024، بڕیارەکەی دادگای فیدراڵی لەبارەی هاوتاکردنی مووچەی خانەنشینان پەسەندکرد و خستیە بواری جێبەجێکردنەوە.
PUKMEDIA