کۆمسیۆنی عیراق تەواوی پڕۆسەی هەڵبژاردنی هەرێم بەڕێوەدەبات

PUKMEDIA

لۆگۆی کۆمسیۆنی باڵای سەربەخۆی هەڵبژاردنەکان

کۆمسیۆنی عیراق تەواوی پڕۆسەی هەڵبژاردنی هەرێم بەڕێوەدەبات و ئەنجومەنی کۆمسیارانیش هەڵسەنگاندن بۆ وادەی پێنجەمی هەڵبژاردنی پەرلەمانی کوردستان دەکات، وتەبێژی کۆمسیۆن ئاماژە بەوەدەکات: "پێنجەمین مەرسومی سەرۆکایەتی هەرێممان لەبارەی هەڵبژاردنەوە پێنەگەیشتووە".

کۆمسیۆن هەڵسەنگاندن بۆ وادەی نوێی هەڵبژاردن دەکات

جومانە غەلای وتەبێژی کۆمسیۆنی باڵای سەربەخۆی هەڵبژاردنەکانی عیراق بە وێبسایتی رەسمی یەکێتیی نیشتمانیی کوردستان PUKMEDIA ی راگەیاند: "دوای گەشتنی مەرسومی نوێی هەرێمی بۆ هەڵبژاردنی خولی شەشەمی پەرلەمانی کوردستان، ئەنجومەنی کۆمسیاران هەڵسەنگاندن بۆ وادەکە دەکات کە لەلایەن سەرۆکایەتی هەرێمەوە دیاریکراوە و پاشان بڕیار دەدات کە ئایا کۆمسیۆن لەو وادەیەدا دەتوانێت هەڵبژاردن بەڕێوەبەرێت یاخود نا".

"هەڵبژاردنی خولی شەشەمی پەرلەمانی کوردستان لەلایەن کۆمسیۆنی باڵای سەربەخۆی هەڵبژاردنەکای عیراقەوە بەڕێوەدەبرێت و بەپێی یاسای هەڵبژاردنی هەرێمی کوردستان رێکارەکانی جێبەجێ دەکات کە خۆی لە ئامادەکاری بۆ هەڵبژاردن و پڕۆسەی دەنگدان و جیاکردنەوە و هەژماری دەنگەکان و راگەیاندنی ئەنجامەکان دەبینێتەوە"، وتەبێژی کۆمسیۆن وادەڵیت.

ئاماژەی بەوەشدا: "کۆمسیۆن بۆ هەڵبژاردنی خولی شەشەمی پەرلەمانی کوردستان، پشت بە تۆماری پەسەندکراوی کۆمسیۆن دەبەستێت کە تێیدا ناوی سەرجەم دەنگدەرانی عیراق بە پارێزگاکانی هەرێمیشەوە لەخۆ دەگرێت، ئەگەر لەدوای ئەنجامدانی هەڵبژاردنیش لایەنێک تانەی هەبێت لە پڕۆسەکە دەتوانێت لە دەستەی دادوەری کۆمسیۆن تانەکەی پێشکەش بکات".

رۆژی 20ـی 10ـی 2024 بۆ ئەنجامدانی هەڵبژاردن دیاریکرا

ئەمڕۆ چوارشەممە 26ـی 6ـی 2024، دڵشاد شەهاب وتەبێژی سەرۆکایەتی هەرێم لە کۆنگرەیەکی رۆژنامەوانیدا رایگەیاند: "سەرۆکی هەرێمی کوردستان مەرسومێکی دیکەی هەرێمی بۆ هەڵبژاردنی پەرلەمانی کوردستان دەرکرد و لایەنە پەیوەندیدارەکانیشی پابەند کرد بە ئامادەکاری بۆ هەڵبژاردنەکە".

"سەرۆکایەتی هەرێم پێی باش بووە رۆژی 20ـی 10ـی 2024 وەک وادەیەکی نوێ بۆ هەڵبژاردنی گشتی خولی شەشەمی پەرلەمانی کوردستان دیاریبکات"، وتەبێژی سەرۆکایەتی هەرێم وای وت.
PUKMEDIA