قوباد تاڵەبانی بۆ باڵیۆزی ژاپۆن:هاوکاری هەرێمی کوردستان بکەن

نووسینگەی رۆژنامەوانی قوباد تاڵەبانی

قوباد تاڵەبانی و باڵیۆزی ژاپۆن لە عێراق

قوباد تاڵەبانی، جێگری سەرۆکوەزیران پێشوازیکرد لە فاتوشی ماتسۆمۆتۆ، باڵیۆزی ژاپۆن لە عێراق و لە کۆبوونەوەی نێوانیاندا چەند پرسێکی جێی بایەخی هەردوولا تاوتوێ کران.

لە کۆبوونەوەکەدا کە رۆژی چوارشەمە ( ٢٦ی حوزەیرانی ٢٠٢٤) لە هەولێر بەڕێوەچوو، جێگری سەرۆکوەزیران سوپاسی هاوکارییەکانی وڵاتی ژاپۆنی کرد بۆ عێراق و هەرێمی کوردستان لە بوارە جیاوازەکاندا و بە تایبەتیش لە بوارەکانی گەشەپێدانی پەرەوەردە و کلتور و رۆشنبیریدا. جەختیشی کردەوە لەسەر پێویستیی پەرەپێدانی پەیوەندییەکانی نێوان هەرێم و وڵاتی ژاپۆن، بە تایبەتیش لە بواری تەکنەلۆژیا و تواناسازی گەنجانی داهێنەر و کارسازدا.

هەر لە کۆبوونەوەکەدا گفتوگۆکرا لەبارەی پڕۆژەی فاوندەیشن هەبەوە کە سەنتەرێکی گرنگی راهێنان و تواناسازی داهێنەر و کارسازە و بڕیارە لە داهاتوویەکی نزیکدا بکرێتەوە. هەردوولا هاوڕابوون کە ئەم پڕۆژەیە رۆڵی دەبێت لە پەرەپێدانی تواناکانی گەنجانی داهێنەر و بەهێزترکردنی کەرتی تایبەت لە هەرێمی کوردستان.

لەم چوارچێوەیەدا قوباد تاڵەبانی داوایکرد وڵاتی ژاپۆن لە سەرخستنی پڕۆژەکەدا هاوکاری هەرێمی کوردستان بکات، چ لە رووی ناردنی راهێنەر و چ لە کردنەوەی خولی راهێنان لە وڵاتی ژاپۆن بۆ داهێنەر و کارسازی هەرێم. باڵیۆزی ژاپۆن لەمبارەیەوە ئامادەیی وڵاتەکەی دەربڕی بۆ هەموو جۆرە هاوکارییەک بۆ سەرخستنی پڕۆژەکە.
PUKMEDIA