٢٦ کاندیدی تورکمان و مەسیحی کێبڕکێی کورسی کۆتا دەکەن

PUKMEDIA

هەڵبژاردی پەرلەمانی کوردستان

لەدوای درێژکردنەوەی وادەی خۆتۆمارکردن هەتا ئێستا ٥٥ هاوپەیمانی و حزب و کاندید بۆ هەڵبژاردنی خولی شەشەمی پەرلەمانی کوردستان ناویان تۆمارکردوەو ئەمڕۆش کۆتا وادە بوو بۆ ناوتۆمار کرد، لەو چوارچێوەیەشدا ٢٦ کاندیدی تورکمان و مەسیحی کێبڕکێ بۆ کورسی کۆتاکان دەکەن.

جومانە غەلای وتەبێژی کۆمسیۆنی باڵای سەربەخۆی هەڵبژاردنەکانی عیراق بە وێبسایتی رەسمی یەکێتیی نیشتمانیی کوردستان PUKMEDIA ی راگەیاند: "رۆژی ٢٤-٦-٢٠٢٤ کۆتا وادەی ناوتۆمارکردنی هاوپه‌یمانێتی و حزب و كاندیده‌كانە بۆ هەڵبژاردنی خولی شەشەمی پەرلەمانی کوردستان و لە ٨-٦-٢٠٢٤ تا ئێستاش ٥٥ هاوپەیمانێتی و حزب و لایەن و کاندیدی حزبەکان و کاندیدانی سەربەخۆ ناویان تۆمارکردووە".

"لەو ژمارانە لە پارێزگای سلێمانی، ٢ حزب و ٨ کاندیدی بۆ دەنگدانی گشتی و ٥ کاندیدی تورکمان و ١ کاندیدی مەسیحی ناویان تۆمارکردوەو لە هەولێر، ٢ هاوپەیمانێتی و ١٣ حزب و ٩ کاندیدی تورکمان و ٧ کاندیدی مەسیحی و ٩ کاندیدی گشتی خۆیان تۆمارکردوەو هاوکات لە پارێزگای دهۆکیش ٤ کاندیدی مەسیحی و ٤ کاندیدی گشتی و ١ حزب خۆیان تۆمارکردووە"، جومانە غەلای وای وت.

ئەمە لەکاتێکدایە پێشتر ١٠ حزب و ٢ هاوپەیمانێتی و ٥٤ کاندید خۆیان تۆمارکردبوو، کە رێژەکە لەگەڵ تۆمارکراوە نوێکان دەکاتە ٤ هاوپەیمانێتی و ٢٦ حزب و ١٠١ کاندید بە سەربەخۆ و کاندیدی لایەنەکان و کاندیدی پێکهاتەکانی تورکمان و مەسیحی.

وتەبێژی کۆمسیۆن: ئامادەین بۆ هەڵبژاردن

له‌سه‌ر دیاریكردنی واده‌یه‌كی نوێ بۆ ئه‌نجامدانی هه‌ڵبژاردنی خولی شه‌شه‌می په‌رله‌مانی كوردستانیش جومانه‌ غه‌لای ده‌ڵێت:"چاوه‌ڕ‌ێی ده‌ركردنی مه‌رسومێكی نوێی هه‌رێمی ده‌كه‌ین له‌سه‌ر دیارییكردنی واده‌یه‌كی نوێی بۆ ئه‌نجامدانی هه‌ڵبژاردنی په‌رله‌مانی كوردستان، هاوكات كۆمسیۆن پێشنیاری خۆی بۆ واده‌یه‌كی نوێی ئه‌نجامدانی هه‌ڵبژاردن به‌ سه‌رۆكایه‌تی هه‌رێم داوه‌ كه‌ رۆژی 5-9-2024".

"پێویسته‌ واده‌ی ئه‌نجامدانی هه‌ڵبژاردنی په‌رله‌مانی كوردستان له‌ ماوه‌ی یاسایی ئه‌نجومه‌نی كۆمسیاراندا بێت، چونكه‌ ئه‌نجومه‌نه‌كه‌ له‌ 6/1/2025 كاره‌كانی كۆتایی پێدێت و پێویسته‌ هه‌ڵبژاردنی په‌رله‌مانی كوردستان پێش كۆتایی ته‌مه‌نی كۆمسیۆن ئه‌نجامبدرێت و ئێمه‌ش ئاماده‌ین بۆ سه‌رپه‌رشتیكردنی هه‌ڵبژاردنه‌كه‌،"وته‌بێژی كۆمسیۆن واده‌ڵێت.

PUKMEDIA