riklam

هاوخەمییەکان بۆکۆچیدوایی بەرزانی قالەی خەڵوز

کوردستان 09:44 PM - 2024-06-18
بەرزانی قالەی خەڵوز PUKMEDIA

بەرزانی قالەی خەڵوز

پرسەنامە

هونەرمەند و میدیاکار و پێشمەرگەی دێرین بەرزانی قالەی خەڵوز کۆچی دوایی کرد و بەو بۆنە خەمناکەوە پرسەنامە و هاوخەمییەکان ئاڕاستەی خانەوادە و کەسوکار و هاوڕێیانی دەکرێت.

 

هاوخەمی قوباد تاڵەبانی...

 

ماڵئاوا هونەرمەند و پێشمەرگە، کاکە بەرزانی قالەی خەڵوز

دوای زیاتر لە ١٠ ساڵ دوورکەوتنەوەی لە شاشە، تازە چاومان بە نواندنە باڵاکەی روون ببووەوە، کەچی بە داخەوە مەرگ مەودای نەدا و دەستی ئەجەل بە یەکجاری لێی ستاندین. لەم ساتەوەختە ناخۆشەدا، رەنگە تەنها شتێک تۆزێک سوکناییمان پێ بدات ئەوەیە کە دڵنیاین کوردستان و بەتایبەتیش زێدەکەی سلێمانی، هەرگیز هونەرە باڵاکەی و نوکتە و قسە خۆشەکانی و ماندووبوون و شەونخونییەکانی سەردەمی پێشمەرگایەتی کاکە بارزان لە بیر ناکەن.

کاکە بارزان جگە لەوەی خزمەتێکی زۆری هونەری نواندنی کوردی کرد، لە شۆڕش و پێشمەرگایەتیشدا هەر خزمەتکاری نەتەوەکەی بوو. لە تەمەنی ١٨ ساڵیدا و لە رۆژگارە سەختەکاندا چەکی شەرەفی پێشمەرگایەتی دەکاتەشان و تا دواساتی تەمەنی لەسەر رێبازەکەی مایەوە.

هەر بەهۆی هونەرە باڵاکەی و راستگۆیی و دڵسۆزییەکەی لە شۆڕش و پێشمەرگایەتیدا، دەبێتە هاوڕێی جێی متمانە و خۆشەویستی سەرۆک مام جەلال و هێرۆخان و سەرکردایەتی یەکێتیی نیشتمانیی کوردستان و تا دواساتیش هەر خۆشەویستی هەمووان مایەوە.

بەم بۆنە دڵتەزێنەوە، لە دڵەوە هاوخەمی خۆم لەگەڵ خانەوادە و کەسوکارە خۆشەویستەکەی و هەموو هەڤاڵە هونەرمەندەکانی دەردەبڕم. خوای گەورە روحی کاکە بەرزان بە بەهەشت شاد بکات و سەبوری و ئارامیش بە هەموولایەک ببەخشێت.

قوباد تاڵەبانی
لێپرسراویی مەکتەبی سکرتارییەتی سەرۆک مام جەلال

 

هاوخەمی کۆسرەت رەسوڵ...

 

کۆسرەت رەسوڵ عەلی هاوخەمی بۆ کۆچی دوایی هونەرمەندو پێشمەرگە بەرزانی قالەی خەڵووز دەردەبڕێت

بەڕێزان کەسوکارو خانەوادەی هونەرمەندو پێشمەرگە بەرزانی قالەی خەڵووز

بەداخێکی زۆرەوە هەواڵی کۆچی دوایی پێشمەرگەو میدیاکارو هونەرمەندی دیارو ناسراوی کورد (بەرزانی قالە خەڵووز)م بیست، دڵگران و خەمباری کردم، هاوبەشی خەمتانم.
هونەرمەندو پێشمەرگە بەرزانی قالە خەڵووز هەموو تەمەنی خۆی بۆ خزمەتکردنی گەلەکەی تەرخان کرد، وەک پێشمەرگە لە کۆڕی خەبات و وەک هونەرمەند لە بواری هونەری هەمیشە لە بەرەی گەلەکەی بووەو بە هونەرەکەی خزمەتی گەلەکەی کردووە، بەداخەوە کۆچی دوایی ئەم هونەرمەندە کەلێنێکی گەورە دروست دەکات، بۆ ئەم کۆستەو خەمە قووڵە پرسەو سەرەخۆشی و هاوخەمی خۆم ئاراستەی کەسوکارو هاوڕێیانی هونەرمەند دەکەم، هیواخوازم ئەمە دواکۆست و ناخۆشی هەموو لایەک بێت، خوای گەورە سەبووریمان بدات و کۆچکردوو جێگای بەهەشتی بەرین بێت.


براتان
کۆسرەت رەسوڵ عەلی

 

هاوخەمی خاتوو گەلاوێژ...

 

بەڕێزان هاوسەر و خێزان و كەسوكاری هونەرمەندی بەتوانا كاكە بەرزان قادر، هەواڵی كۆچی دوایی بەرزانی قالەی خەڵوز لەناخی دڵەوە خەمباری كردم، كاكە بەرزان هونەرمەندێكی دیاری سەر شانۆ و شاشەكان بوو، بە تایبەت شاشە ڕەنگینەكانی خاك و كوردسات.

كاكە بەرزان لەهەڕەتی لاویدا چووە ڕیزی پێشمەرگەكانی یەكێتییەوە و هەرزوویش بووە خۆشەویستی هاوڕێ پێشمەرگەكانی و بووە كەسێكی متمانەپێكراوی مام و هێرۆ و هەمیشە بە قسە خۆشەكانی خەمی هەموانی دەڕەواندەوە.

شانۆگەرییەكان و بەرنامەكانی كەشكۆڵ و بەرنامەی بەرنامە و دەیان كاری دیكەی هونەریی بەرزان و هاوڕێكانی هەمیشە جێی سەرنجی جەماوەرە زۆرەكەیان بووە، بۆیە یادی كاكە بەرزان هەر بە بەرزیی لەناو بیر و هۆشی خەڵكی كوردستاندا دەمێنێتەوە.

لەم كۆستە گەورەیەدا پرسە و سەرەخۆشیی خۆم ئاراستەی هاوسەر و كەسوكارەكەی و هەموو هونەرمەندانی كوردستان و هاووڵاتیان دەكەم و لەخوای گەورە داواكارم گیانی كاكە بەرزان بە بەهەشتی بەرینی خۆی شاد بكات و سەبوریی بەدڵی هەموانیش ببەخشێت.

گەلاوێژ

 

دەقی پرسەنامەی مەکتەبی سیاسی...

 

کەسوکار  و خانەوادەی پێشمەرگەی دێرین وهونەرمەند و میدیاکار کاک بەرزان قادر ناسراو بە بەرزانی قادری خەڵوز، بەداخ وپەژارەیەکی زۆرەوە هەواڵی کۆچی دوایی کاک بەرزانمان پێگەیشت بۆ ئەم خەمە خۆمان بەهاوبەشی پرسە و ماتەمتان دەزانین .

 

کاک بەرزان لە هەڕەتی لاوییەوە بەشدارێکی کۆڕی خەبات وتێکۆشانی بزوتنەوەی ڕزگاریخوازی گەلەکەمان بوەو لە شۆڕشی نوێی گەلەکەماندا لەسەرەتای هەشتاکانەوە پەیوەندی بەڕیزەکانی هێزی پێشمەرگەی کوردستانەوە کردوەو لەسنوری تیپی 47 ی پیرەمەگرون و دەستەی مەکتەبی سیاسی ڕۆڵی بەرچاوی بینیوە. لەدوای ڕاپەڕینیشەوە وێڕای کاری پێشمەرگانە ی لەبواری  ڕاگەیاندن و لەبەرنامەی کەشکۆڵی تەلەفزیۆنی گەلی کوردستان و دواتر  لە کەناڵی خاک وکوردسات لەبەرنامەی بەرنامەدا  وەک  ئەکتەرێکی  سەرەکی بەشداری و ئەفراندنی چۆنایەتی کردوە، بەڕێوەبەری  ڕادیۆی خاک بوە و لە بواری پاراستنی کەلەپوری مێژوویی  و شوێنەواردا بە ڕێنمایی سەرۆک مامجەلال و خاتوو هێرۆ خان  هاوکارێکی سەرەکی ئەوبوارە بوە و لەدۆزینەوە وگەڕاندنەوەی چەندین پارچەشوێنەواردا  جێ دەستی دیار بوە.

 

لەیەزدانی مەزن داواکارین بەهەشتی بەرین جێکەی بێت و سەبوری بە کەسوکار و هەڤاڵەکانی بدات .

 

انا للە وانا الیە راجعون                 
مەکتەبی سیاسی 

یەکێتیی نیشتمانیی کوردستان

 

دەقی پرسەنامەی بۆردی راگەیاندن...

 

بۆردی راگەیاندنی یەکێتی لە پرسەنامەیەکدا سەرەخۆشی لە بنەماڵە و هاوڕێیانی پێشمەرگەی دێرین و هونەرمەند بەرزانی قالەی خەڵوز دەکات 

بەداخ و خەمێکی قوڵەوە. ئەمڕۆ پێشمەرگەی دێرینی یەکێتیی نیشیمانیی کوردستان و هونەرمەند و میدیاکاری بەتوانای کوردستان (بەرزان قادر) ناسراو بە (بەرزانی قالەی خەڵوز)  لە شاری سلێمانی کۆچی دواییکرد و جێی هێشتین. 

ئەم کۆچە ناوەخت و پڕ خەمە دڵتەنگی کردین و بۆ ئەم کۆستە بەناوی بۆردی ڕاگەیاندن و سەرجەم میدیاکارانی ڕاگەیاندنی یەکێتیی نیشتمانیی کوردستانەوە، پرسە و سەرەخۆشی لە خانەوادە و کەسوکار و هاوڕێ و هاوپیشەکانی کاکە بەرزان دەکەین و دەپاڕێینەوە لە یەزدانی مەزن، جێگەی کۆچکردو بەهەشتی نەبڕاوە بێت و سەبووریی و ئارامیش بە هەموو لایەک ببەخشێت. 

بەرزان - ی هونەرمەند و پێشمەرگە، هەموو ژیانی بۆ خزمەت و ئامانجە باڵاکانی نەتەوەکەی تەرخانکردبوو، ڕۆژگارێک بە تفەنگەکەی بەرگری لە خەونی ڕزگاری کوردستان دەکرد و لە سەردەمی ئازادیشدا بە ڕەخنە و زمانی تەنز و بەرنامەکانی بە شوێن دادپەروەری و خەونی وڵاتێکی بێ چەوسانەوەوە بوو، بەم کۆچەشی کەلێنێکی گەورەی دروستکرد و هەرگیز شوێنەکەی پڕنابێتەوە.


جارێکی تر سەرەخۆشی دووبارە دەکەینەوە و سڵاو بۆ گیانی هونەرمەند و پێشمەرگە دەنێرین.

بۆردی ڕاگەیاندنی یەکێتیی نیشتمانی کوردستان

 

PUKMEDIA

ئەمانەش ببینە

زۆرترین خوێنراو

هەواڵەکان دەنێرین بۆ مۆبایلەکانتان

ئەپڵیکەیشنی

app دابەزێنە

Play store app store app
The News In Your Pocket