لەتیف نێروەیی: کۆنفرانسەکان بۆ خۆڕێکخستنەوەی ئەرک و ئۆرگانەکانی یەکێتییە

PUKMEDIA

کۆنفرانسی مەکتەبی رێکخستن

لێپرسراوی بۆردی راگەیاندنی یەکێتیی نیشتمانیی کوردستان دەڵێت:" لە كۆنفرانسی مەكتەبی رێكخستندا ئەوەی كە هەر زوو سەرنجی بەشداربووانی كۆنفرانسەكەی راكێشا یەكلاییكردنەوەی پرسی ئەنجومەنی راوێژكاران و پشتیوانی بوو كە تا رادەیەك دوو ئەنجومەنی بێ ئەرك بوون و خۆیان بە فەرامۆشكراو دەزانی، لەڕێی كۆنفرانسەوە، سەرلەنوێ ئەو دوو ئەنجومەنە لە چوارچێوەی بەشێكی نوێدا بە ناوی بەشی ئەنجومەنی پشتیوانی رێكدەخرێن و دوو ئەركی گرنگ و كاریگەر بە هەڤاڵانی ئەو ئەنجومەنە دەسپێردرێن ".

لەتیف نێروەیی لێپرسراوی بۆردی راگەیاندنی یەکێتیی نیشتمانیی کوردستان لەوتارێکدا بە ناونیشانی هەڵوەستەیەك لەسەر كۆنفرانسی راگەیاندن و رێكخستن کە لە بەشی بیروڕای PUKMEDIA بڵاوکراوەتەوە رایدەگەیەنێت:" ئەنجامدانی كۆنفرانسی بۆردی راگەیاندن و مەكتەبی رێكخستن، پرۆسەیەكە خۆی لە جێبەجێكردنی راسپاردە و بڕیارەكانی كۆنگرەی پێنجەمدا دەبینێتەوە، لەرووی پراكتیزەكردنەوە دەكەوێتە خانەی تەواوكاری كۆنگرەی پێنجەم، چونكە ئەركی سەرلەنوێ رێكخستنەوەوی پەیكەری ئۆرگانەكان و دانانی نەخشە و رێكارێكی نوێی كاری ئۆرگانی كە لەگەڵ هەلومەرج و قۆناغی ئێستادا گونجاو بێت و ببێتە فاكتەری كۆكردنەوە و رێكخستنەوەی توانا مرۆییەكان و سەرلەنوێ‌ بەگەڕخستنەوەیان، ئەم ئەركە دیموكراسی و رێكخراوەییەش بۆ خودی ئۆرگانەكان بەجێ هێڵراوە و ئەم ئامانجەش تەنها بە ئەنجامدانی كۆنفرانسی ئۆرگانەكان دێتەدی".

دەشڵێت:" لەكاتی بەڕێوەچوونی هەردوو كۆنفرانسدا، زۆربەی ئەندام و بەشداران بە جۆش و خرۆشێكی زۆرەوە بەشدارییان لە لیژنەكاندا دەكرد و ئومێدێكی گەورەیان بۆ كۆنفرانسەكان و پاشانیش بۆ دەرەنجام و راسپاردەكانی هەڵچنیبوو، دیدێكی وا هەبوو كە كۆنفرانسەكان گۆڕانكارییەكی گەورە بە دوای خۆیاندا دەهێنن و چارەسەرێكی ریشەیی بۆ كۆی كێشەكان فەراهەم دەكەن، هاوکات پەیام و سیاسەتی فەرمی یەكێتیی نیشتمانیی كوردستان لەڕێی میدیای رەسمی یەكێتیەوە بە رایگشتی دەگات و هەر لەڕێی میدیاوە رایگشتی حزبی بۆ هەڵبژاردن و پرسە جۆراوجۆرەكان دروست دەكات و سیاسەتی راست و دروستی یەكێتی شیدەكاتەوە و بەرگری لێ دەكات".

PUKMEDIA