riklam

لێپرسراوی نوێی مەڵبەندی گەرمیان دەستبەكار دەبێت

کوردستان 11:37 AM - 2023-11-23
 مەڕاسیمی دەستبەكاربوونی لێپرسراوی نوێی مەڵبەندی گەرمیان  دەرباز ستار

مەڕاسیمی دەستبەكاربوونی لێپرسراوی نوێی مەڵبەندی گەرمیان

یەکێتیی نیشتمانیی کوردستان

ئەمڕۆ پێنج شەممە 23-11-2023، بە ئامادەبوونی سەركەوت زەكی لێپرسراوی مەكتەبی رێكخستن و سەعدی ئەحمەد پیرە وتەبێژی یەكێتی و ژمارەیەك لە ئەندامانی مەكتەبی سیاسی و سەركردایەتی  و ئەندام و كادیرانی مەڵبەندی گەرمیان، لە مەڕاسیمێكی تایبەتدا ئاڵوگۆڕی پۆستی لێپرسراوی مەڵبەندی گەرمیانی یەكێتیی نیشتمانیی كوردستان كرا.

 

لە مەڕاسیمەكەدا سالار مەحمود ئەندامی سەركردایەتی یەكێتیی نیشتمانیی كوردستان بە لێپرسراوی نوێی مەڵبەندی گەرمیان دانرا، پێزانینیش ئاڕاستەی میقداد شێخ بەهادین وەك لێپرسراوی پێشووی مەڵبەند كرا لەپای ئەوەی لە ساڵانی رابردوودا جێدەستی دیاربووە و لەگەڵ ئەركە حزبییەكەیدا خزمەتی گەرمیانییەكانی كردووە.

لەپاش ساتێك وەستان بۆ گیانی پاكی شەهیدان، میقداد شێخ بەهادین لێپرسراوی پێشووی مەڵبەندی گەرمیانی یەكێتیی نیشتمانیی كوردستان وتەیەكی پێشكەشكرد و رایگەیاند: "گەرمیانییەكان قوربانی زۆریان بۆ شۆڕشی نوێ و یەكێتیی نیشتمانیی كوردستان داوە و ئەركی یەكێتییە خزمەتی زیاتری وارسی شەهیدەكان و گەرمیانییەكان بكات، ئەمە جگە لەوەی یەكێتی لە ئێستادا لە گەرمیان خاوەنی زیاتر لە 60 هەزار دەنگە و پێویستە خزمەتیان بكەین".

"یادی 48 هەمین ساڵیادی یەكێتیی نیشتمانیی كوردستان لە قەڵای شێروانە لە كەلار سەلمێەری ئەو راستیەیە كە گەرمیانییەكان بێ هیچ بەرژەوەندییەك و بەدڵ لەگەڵ یەكێتییەكەی خۆیاندان و خوێنیان پێبەخشیوە" میقداد شێخ بەهادین وادەڵێت.

راشیگەیاند: "جێی خۆیەتی هەر لێرەوە سوپاسی مەكتەبی رێكخستن و هەموو ئەو هەڤاڵانە بكەم كە لە چەند ساڵی رابردوودا هاوكارمان بوون و قەڵایەك لە پشتمان بوون، داواشیان لێدەكەم هەر بەو رۆحییەتە گەرمیانیانەوە پشتیوانی لێپرسراوی نوێی مەڵبەندی گەرمیان بن و یەكێتی بەهێزتر بكەن".


هەر لە مەڕاسیمەكەدا سەركەوت زەكی لێپرسراوی مەكتەبی رێكخستنی یەكێتیی نیشتمانیی كوردستان وتەیەكی پێشكەشكرد و رایگەیاند: "ئاڵوگۆڕكردنی پۆستەكان لەناو یەكێتی دا نەریتێكی سروشتییە و ئەمڕۆ ئاڵوگۆڕی لێپرسراوی مەڵبەندی گەرمیان دەكەین و دواتریش لە بەشێك لە مەڵبەندەكان هەمان پڕۆسە ئەنجام دەدەین، كە یەكێتییەكان بە رۆحێكی سیاسیانەی حزبیانەی بەرزەوە پێشوازی لەم هەنگاوە دەكەن".

راشیگەیاند: "میقداد شێخ بەهادین تێكۆشەرێكی دێرینی یەكێتیی نیشتمانیی كوردستانە و جێدەستی لە خزمەتكردنی دانیشتووانی سنوورەكەدا دیارە و ئێمەش هەوڵدەدەین خزمەتی زیاتری مەڵبەندی گەرمیان بكەین و كەمتەرخەمییەكان نەهێڵین و یەكێتییەكی گەشتر و سەركەوتووتر پێشكەش بە كۆمەڵانی خەڵكی كوردستان بكەین چونكە گەشەكردنی یەكێتی یەكسانە بە گەشەكردنی كوردستان".

PUKMEDIA

ئەمانەش ببینە

زۆرترین خوێنراو

هەواڵەکان دەنێرین بۆ مۆبایلەکانتان

ئەپڵیکەیشنی

app دابەزێنە

Play store app store app
The News In Your Pocket