riklam

سەعدی ئەحمەد پیرە: پێویستە پەیوەندی نێوان لایەنەكان باشتر بكرێت

کوردستان 07:47 PM - 2023-11-09
سەعدی ئەحمەد پیرە PUKMEDIA

سەعدی ئەحمەد پیرە

یەکێتیی نیشتمانیی کوردستان

سەعدی ئەحمەد پیرە وتەبێژی یەكێتی رایدەگەیەنێت: "پێویستە پەیوەندی نێوان لایەنە كوردستانییەكان باشتر بكرێت و نێوماڵی كورد رێكبخرێتەوە و بۆ ئەو مەبەستەش یەكێتی سەردانی سەرجەم لایەنەكان دەكات".

 

کۆنگرەی پێنجەمی یەکێتی سەرکەوتوبوو

سەعدی ئەحمەد پیرە وتەبێژی یەکێتیی نیشتمانیی کوردستان، ئەمڕۆ پێنجشەممە ٩-١١-٢٠٢٣، لە میانی بەشداریکردنی لە گەشتی هەواڵەکانی کەناڵی گەلی کوردستان دا رایگەیاند: "کۆنگرەی پێنجەمی یەکێتی زۆر سەرکەوتوو بوو، هەروەها گۆڕانکاری گەورەی لە بوارە جیاجیاکان بەسەر یەکێتیدا هێنا".

"دوای تەواوبوونی کۆنگرە، دەستکراوە بە پەیوەندییەکان و رۆژی سێ شەممە لەسەر ئاستی باڵا لەگەڵ پارتی دیموکراتی کوردستان کۆبووینەوە کە تیمی یەکێتی لەلایەن سەرۆک بافڵەوە سەرپەرشتی دەکرا و تیمی پارتیش لەلایەن نێچیرڤان بارزانی سەرۆکی هەرێمی کوردستانەوە سەرپەرشتی دەکرا و سەرۆکی حکومەت و جێگری سەرۆکی حکومەتیش بەشداربوون"، "لەو کۆبوونەوەدا باس لەوەکرا کە ئێمە چی بکەین و چۆن کێشەکان چارەسەر بکەین، لامان روون بوو کە هەرێمی کوردستان بەبێ پێکەوە کارکردنی یەکێتی و پارتی ئیدارە نادرێت و پێویستە پێکەوە کار بکەین"، سەعدی ئەحمەد پیرە وادەڵێت.

وتیشی: "دەبێت کات بەفیڕۆنەدەین بە ناکۆکی و دورکەوتنەوە لە یەکتری، دەبێت لایەنە سیاسییەکان هەوڵەکان چڕبکەینەوە بۆ پاراستنی قەوارەی هەرێم و بەگژداچوونەوەی ناحەزان، هەروەها کێشەیەکی دیکە ئەوەیە لە شاری سلێمانی چەندین هەفتەیە مامۆستایان مانیان گرتووە و خوێندکاران بێ مەکتەب و خوێندنن، بۆیە بڕیارماندا کە هەردوو لامان و لایەنەکانی دیکەش بانگ بکەین بۆ پشتیوانیکردن لە هەوڵەکانی حکومەتی هەرێم بۆ دابینکردنی مووچە بۆ هاووڵاتیان، هەروەها ئێمە دەزانین لە ئەنجامی ئەو کێشانەی کە لە نێوان ئیسرائیل و غەززە هەیە، بارودۆخێکی زۆر ئاڵۆز لەسەر سنوورەکانی ئێمە هەیە، ئێمەش میللەتێکی ماندومان هەیە و دەبێت هەموو هەوڵەکانی خۆمان بدەین تا میللەتەکەمان دووربێت لە کێشە و بحەسێتەوە".

بەرگری لە هەرێمی کوردستان بکەین

وتەبێژی یەکێتی ئەوەشی راگەیاند: "هەوڵێک هەیە لە عیراق لەلایەن هەندێک لایەنی بەشدار لە حکومەتی عیراقی فیدراڵ و لە پەرلەمانیش نفوزیان هەیە کە دەیانەوێت ئامادەبوونی بێگانە لە لە عیراق بە گشتی و لە هەرێمیش کەم بکرێتەوە کە سەفارەتەکان و هێزەکانی هاپەیمانان و رێکخاروە نێودەوڵەتییەکان دەگرێتەوە، کە پێموایە بۆ نەتەوەی کورد و پێکهاتەکان بە گشتی، ئەم لایەنە نێودەوڵەتییانە زۆر گرنگن هەر هەوڵدانێک بیەوێت ئەوانە کەم بکاتەوە، ئەوە هیچ پێویست نییە و هەڕەشەیەکی راستەوخۆیە بۆسەر ئێمە، بۆیە پێویستە هەوڵی خۆمان بدەین و لایەنە کوردستانییەکان لە یەک سەنگەردا بین بۆ بەرگریکردن لە هەرێمی کوردستان"

"کۆبوونەوەمان لەگەڵ پارتی تەواو نەبووە و کێشەکان لە نزیکترین دەرفەتدا چارەسەر دەکرێن و دواتر سەردانی هەموو لایەنەکانی دیکەش دەکەین و ئەو خاڵەی لەگەڵ هەموو لایەنەکان تەئکیدی لێدەکەینەوە، یەکخستنی ماڵی کوردە"، سەعدی ئەحمەد پیرە وای وت.

PUKMEDIA

 

ئەمانەش ببینە

زۆرترین خوێنراو

هەواڵەکان دەنێرین بۆ مۆبایلەکانتان

ئەپڵیکەیشنی

app دابەزێنە

Play store app store app
The News In Your Pocket