riklam

لەتیف نێروەیی: یەکێتی دەستی ئاشتەوای بۆ لایەنەکان درێژ دەکات

کوردستان 08:59 PM - 2023-11-07
لەتیف نێروەیی PUKMEDIA

لەتیف نێروەیی

یەکێتی

لێپرسراوی بۆردی راگەیاندنی یەکێتی باس لە گرنگی و ئەنجامەکانی کۆبونەوەی ئەمڕۆی یەکێتی و پارتی دەکات و دەڵێت: " یەکێتی دەستپێشخەری کردووە و پەیامی ئاشتەوایی راگەیاندووە و بێ مەرج ئامادەیە دەستی تەبایی و ئاشتی بۆ هەموو لایەنە سیاسییەکان درێژ بکات، خۆشبەختانە هەنگاوە سەرەتاییەکان ئەرێنین و دەبێت بە شێوەیەکی ئەرێنی لێی بڕوانین".

لەتیف نێروەیی ئەندامی سەرکردایەتی یەکێتیی نیشتمانیی کوردستان و لێپرسراوی بۆردی راگەیاندنی یەکێتی لە بەرنامەیەکی کەناڵی ئاسمانی گەلی کوردستاندا لەبارەی ئەنجامەکانی کۆبونەوەی هەردوو وەفدی باڵای یەکێتی و پارتی رایگەیاند: "کۆبونەوەی ئەمڕۆ لە هەلومەرجێکدا ئەنجامدراوە کە زەروریەت بوو،  واپێویست دەکات نەک تەنها یەکێتی و پارتی، بەڵکو هەموو لایەنە سیاسییەکانی دیکەی کوردستان کۆدەنگییان هەبێت و رووبەرووی مەترسییەکان ببنەوە، بەتایبەت لەم دۆخەی ئێستادا کە رووداوە گرنگەکان لە تەشەنەدان و دەبێت هەوڵبدرێت بۆ بەرگریکردن لەهەموو روداوەکان".

"کۆبوونەوەکە لەنێوان دوو هێزی سەرەکی کوردستان و عیراق ئەنجامدرا و بە دەستپێشخەری یەکێتیی نیشتمانیی کوردستان بوو بۆ گەیاندنی پەیامی پێنجەمین کۆنگرەی یەکێتی کە لەدوای کۆنگرەوە لەلایەن سەرۆک بافڵ-ەوە ئاڕاستەی سەرجەم لایەنەکان کراوە و یەکەم لایەنیش پارتی بوو"، لەتیف نێروەیی وای وت.

 

مووچەی فەرمانبەران تەوەرێکی سەرەکی کۆبونەوەکە بوو

هەر لە چاوپیکەوتنەکەدا لەتیف نێروەیی وتی: "راستە لەگەڵ پارتی کێشە و ناکۆکیمان هەیە، بەڵام کۆمەڵێک بەرپرسیارێتی هاوبەشیشمان هەیە، هەمیشەش لە قۆناغە هەستیارەکاندا یەکێتی دەستپێشخەر بووە کە بچێتە ژێرباری ئەو بەرپرسیارێتییانەوە، گرنگترین تەوەری کۆبونەوکەش بابەتی مووچەی فەرمانبەران و مامۆستایان و دەنگی ناڕازییان و چۆنیەتی چارەسەرکردنی ئەم کێشانە بوو بە هەماهەنگی لەگەڵ حکومەتی فیدڕاڵ".

 

ئەوەش دەڵێت: "دانوستان پێویستی بە سنگ فراوانی و لێبوردەیی و پشودرێژی و دانبەخۆداگرتن هەیە و هەستکردن بە پاراستنی بەرژەوەندی هەردوو لایەن، بۆئەوەی بتوانیت خاڵە هاوبەشەکان بدۆزینەوە، یەکێتی پشودرێژ بووە هەموو کات و لەهەموو دانوستانەکان و کۆڵی نەداوە هەتا گەیشتن بە دانوستانی هاوبەش و سەرکەوتنی بەدەستهێنا، لەم کۆبونەوەیەشدا هەنگاوە سەرەتاییەکان ئەرێنین و دەبێت بە شێوەیەکی ئەرێنی لێی بڕوانین".


"دۆخی عیراق نەخوازراوە و لە بەرژەوەندی هیچ لایەنێکدا نییە و پێویستە هەموو لایەنەکان هەوڵەکانیان چڕبکەنەوە بۆئەوەی عیراق یەک ئیرادەی هەبێت بۆ چۆنیەتی رووبەڕووبوونەوەی ئەو بارودۆخەی کە هاتۆتە پێشەوە بۆئەوەی تەشەنە نەکات، گەر بارودۆخەکە لە عیراق تێکبچێت هەرێمی کوردستانیش بەدەر نابێت لەو ئاڵۆزییە"، نێروەیی وا دەڵێت.

لە هەرێم ناکۆک بین ناتوانین لە بەغدا یەک دەنگ بین

ئەندامەکەی سەرکردایەتی یەکێتی ئاماژەی بەوەشكرد: "یەکێتی دەستپێشخەری کردووە و پەیامی ئاشتەوایی راگەیاندووە و بێ مەرج ئامادەیە دەستی تەبایی و ئاشتی بۆ هەموو لایەنە سیاسییەکان درێژ بکات، هەتا بتوانین پێکەوە هەوڵ بدەین بۆ دۆزینەوەی چارەسەرێک بۆ کێشە ناوخۆییەکانی هەرێمی کوردستان، چونکە گەر لە هەرێم ناکۆک بین ناتوانین لە بەغدا یەک دەنگ بین".

 

لەکۆتایی قسەکانیشیدا وتی: "کۆبوونەوەکەی ئەمڕۆ دانوستانێکی جددی هەبووە و ئەمڕۆ ئیرادەی ئەوە بەدیدەکرا کە هەنگاوەکان بەرەو زیاتر دۆزینەوەی خاڵە هاوبەشەکانە، چونکە هەرکات خاڵی هاوبەش زۆربوو، خاڵە ناکۆکەکان بچوک دەبنەوە و لاواز دەبن، ئەمرۆ جەخت لەسەر بەهێزکردنی خاڵە هاوبەشەکان کراوەتەوە".

 

PUKMEDIA

ئەمانەش ببینە

زۆرترین خوێنراو

هەواڵەکان دەنێرین بۆ مۆبایلەکانتان

ئەپڵیکەیشنی

app دابەزێنە

Play store app store app
The News In Your Pocket