riklam

فەهمی بورهان: تەعریب و ماددەی ١٤٠ ژوری عەمەلیاتی دەوێت

کوردستان 12:01 PM - 2023-06-22
فەهمی بورهان سەرۆکی دەستەی گشتی ناوچە کوردستانییەکان  PUKMEDIA

فەهمی بورهان سەرۆکی دەستەی گشتی ناوچە کوردستانییەکان

یەکێتیی نیشتمانیی کوردستان

داگیرکردنی زەوی و زاری جوتیارانی کورد و تورکمان لەناوچە جێناکۆکەکان زیادیکردووە و بڕیارەکەی هادی عامریش لەبارەی راگرتنی تەعریبکردنی ئەو ناوچانە بەگرنگ دەزانرێت، سەرۆکی دەستەی گشتی ناوچە کوردستانییەکانیش دەڵێت:"داوامان لە ئەنجومەنی وەزیرانی هەرێم کردووە ژورێکی عەمەلیات لەنێوان لایەنە کوردستانی و عیراقییەکان بۆ ماددەی ١٤٠ دروستبکرێت و بەوردی چاودێری بڕیارەکان بکرێن، تا رێگربێت لەتەعریبکردنی ئەو ناوچانە".

بڕیارەکەی هادی عامری گرنگ بوو

فەهمی بورهان سەرۆکی دەستەی گشتی ناوچە کوردستانییەکان لە لێدوانێکدا بەسایتی رەسمی یەکێتیی نیشتمانیی کوردستان PUKMEDIA ی راگەیاند:" بڕیارەکەی هادی عامری وەک سەرۆکی لیژنەی ماددەی١٤٠ بایەخێکی گەورەی هەیە و پێشهاتێکی گرنگە و بە هەنگاوێکی ئیجابی دەبینین، ئومێد دەکەین ئەم نوسراوە بتوانێت دوا ئەرکی خۆی جێبەجێبکات، بەشێک لە کێشەکانی ئێمە بە تایبەتی کێشەی زەوی و زار لەو ناوچانە چارەسەر بکات".


"بڕیارەکەی هادی عامری ماف بۆ مافخوراوانی دەگێڕێتەوە و کۆتایی بەو تەعریب کردنە دەهێنێت، کە کرابووە سەر زەوی کورد و تورکمانەکان، هەروەها بۆ چاودێریکردنی جێبەجێکردنی بڕیارەکەش، ئێمە نوسراوێکمان ئاڕاستەی ئەنجومەنی وەزیران کردووە و داوامانکردووە ژورێکی عەمەلیات بە بەشداری سەرۆکی هەموو فراکسیۆنە کوردستانییەکان و نوێنەری حکومەت لە بەغدا و نوێنەرانی کورد لەلیژنەی ماددەی ١٤٠ دروستبکرێت، تاوەکو بتوانین لەرێگەی ئەم ژوورەوە، روئیایەکی کۆنکرێتی دابرێژین بۆ چۆنێتی مامەڵەکردنمان بۆ پێشهاتەکان و بتوانین چاودێرییەکی وردتری ئەو بڕیارە بین"، فەهمی بورهان وایوت.

 

 ماددەی ١٤٠ پێویستی بەیەکدەنگی هەیە

ماددەی ١٤٠ وەک پرسێکی نیشتمانیی پێویستی بەیەکدەنگی کورد هەیە، پشتبەست بەوەی سەلمێنراوە هەرکاتێک کورد یەکگرتوو بوبێت دەستکەوتی زیاتری بەدەستهێناوە و بەپێچەوانەشەوە دەستکەوتی زۆر لەدەستدراوە.

سەرۆکی دەستەی گشتی ناوچە کوردستانییەکان ئاماژەی بەوەشکرد:" پێشتر سەلمێنراوە هەرکاتێک کورد یەکگرتوو بوبێت دەستکەوتی زیاتری بەدەستهێناوە و بەپێچەوانەشەوە لەکاتی پەرتەوازەیی ماڵی کورد دا دەستکەوتی زۆر لەدەستدراوە، ماددەی ١٤٠یش وەک پرسێکی نیشتمانیی پێویستی بەیەکدەنگی کورد هەیە و دەبێت رێگری بکرێت لە داگیرکردنی زەویوزار و موڵکی جوتیارە کورد و تورکمانەکان".

لەسەر داوای یەکێتی لیژنەی ماددەی ١٤٠ کاراکرایەوە

لەگەڵ پێکهێنانی حکومەتی نوێی عیراق یەکێتیی نیشتمانیی کوردستان ژمارەیەک پرۆژەی لەپێناو خزمەتی گەلی عیراق بەگشتی و خەڵکی هەرێمی کوردستان بەتایبەتی پێشکەش بەکابینەکەی سودانی کرد، کە یەکێک لە پرۆژەکان کاراکردنەوەی لیژنەی ماددەی ١٤٠ بوو، پاشان لەسەر داوای یەکێتی لیژنەی ماددەی ١٤٠ کاراکرایەوە و هادی عامریش وەک سەرۆکی لیژنەکە دەستبەکاربوو، لەئێستاشدا لەکاتێکدا هەوڵی داگیرکردنی زەوی و زاری جوتیارانی کورد و تورکمان لەناوچە جێناکۆکەکان دەدرێت، سەرۆکی لیژنەکە لەرۆژی ١٨-٦-٢٠٢٣ نوسراوێکی ئاراستەی ئەنجومەنی وەزیران کردوو داوای کرد ئەو پێشێلکارییانە رابگیرێت.

هانا بۆ دادگای فیدراڵی دەبرێت

لەسەر هەمان پرس دوو پەرلەمانتاری ئەنجومەنی نوێنەرانی عیراق سکاڵایان لە دژی داگیرکردنی زەوی و زاری جوتیارە کورد و تورکمانەکان لەدادگای فیدڕاڵی تۆمارکردووە و دیلان غەفور لەسەر سکاڵاکەیان بۆ PUKMEDIA وتی:" لەڕێی دادگاوە رێگردەبین لەهەموو ئەو دەستوەردانە نایاساییانەی کەبەرامبەر بە جوتیارانی کورد و تورکمان لە سنوری پارێزگای کەرکوک دەکرێن و عەرەبی هاوردە دەخرێنە سەر زەوی و زاریان، هەر لە چوارچێوەی هەوڵەکانمان سکاڵامان گەیاندوەتە دادگای فیدراڵی و داوامانکردووە رێگری لە عەرەبی هاوردە بکرێت بۆ سەر زەوی کورد و تورکمانەکان".

لەبەرامبەردا فەهمی بورهان سەرۆکی دەستەی گشتی ناوچە کوردستانییەکان پشتیوانی تەواوی خۆی بۆ سکاڵاکەی ئەو دوو پەرلەمانتارە دەربڕی و رایگەیاند:" هیوادارین دادگای فیدراڵی سکاڵاکەی ئەو دوو پەرلەمانتارە بەهەند وەربگرێت و رێگری بکات لەپێشێلکردنی مافی ئەو جوتیارانە".

ماوەی چەند ساڵێکە داگیرکردنی زەوی و زاری جوتیارانی کورد و تورکمان لە سنوری پارێزگای کەرکوک بەبەرنامە کاری بۆ دەکرێت و لەو چوارچێوەیەشدا ژمارەیەکی زۆر عەرەب هاوردە کراوە و لەسەر زەوی و زاریان جێگیر کراون

PUKMEDIA


ئەمانەش ببینە

زۆرترین خوێنراو

هەواڵەکان دەنێرین بۆ مۆبایلەکانتان

ئەپڵیکەیشنی

app دابەزێنە

Play store app store app
The News In Your Pocket