دوو پەرلەمانتار: نزیكەی 11 ملیار دۆلار لە چوار بانکی هەرێمەوە براوەتە دەرەوە

دوو پەرلەمانتار: نزیكەی 11 ملیار دۆلار لە چوار بانکی هەرێمەوە براونەتە دەرەوە

لە راگەیەندراوێكی هاوبەشی دوو پەرلەمانتاری عیراق و كوردستاندا هاتووە: "لەلایەن بانكە ئەهلییەكانەوە بە شێوەیەكی مەترسیدار پارە سپیدەكرێتەوە بەشێوەیەك تەنها لەماوەی شەش ساڵدا 78 ملیار دۆلار لەرێگای 48 بانكەوە براوەتە دەرەوەی وڵات، تەنها لە چوار بانكی هەرێمیشەوە نزیكەی 11 ملیار دۆلار رۆشتووەتە دەرەوە".

سۆران عومەر ئەندامی ئەنجومەنی نوێنەرانی عیراق و عەلی حەمەساڵح ئەندامی پەرلەمانی كوردستان لە راگەیەندراوێكی هاوبەشدا رایانگەیاندووە: " شێوازێكی مەترسیداری سپێكردنەوەی پارە لە رێگای بانكە ئەھلییەكانی عیراقەوە ئەنجامدراوە بەشێوەیەك لەماوەی شەش ساڵدا 78 ملیار دۆلار لە 48 بانكەوە نێردراوە بەبێ ئەوەی ناوی ئەو كەسانە تۆماركرابێت كە پارەكەیان نادرووەتە دەرەوەی عیراق، چوار لەو بانكانە لەھەرێمی كوردستانن".

راشیانگەیاندووە: "لەساڵانی ( 2009، 2010، 2011، 2012، 2013، 2014) نزیكەی 128 ھەزار و 165 حەواڵە بۆ دەرەوەی عیراق ئەنجامدراوە، كە بڕی پارەكە (209 ملیار و 999 ملیۆن دۆلار بووە، لە كۆی ئەم حەواڵەو مەبلەغە 19 ھەزار و 93 حەواڵەی كەس نازانێ كێ ناردویەتییە دەرەوەی عیراق، بڕی ئەو پارانەش 78 ملیار و 583 ملیۆن دۆلارە!".

لە راگەیەندراوە هاوبەشەكەی ئەو دوو پەرلەمانتارەشدا ئەوە هاتووە: "كە ئەو 78 ملیار دۆلارە كە قەیدەكانی ناوی كەسی لەسەر نەبووە و حەواڵە كراوە لە رێگای 48 بانكەوە براوەتە دەرەوەی وڵات، بەشێك لەو بانكانەش لقیان لەھەرێمی كوردستان ھەیە، لەو 78 ملیار دۆلارە 10 ملیارو 781 ملیۆن دۆلاری لە رێگای چوار بانكی ھەرێمەوە حەواڵە كراون! كە بریتین لە: ( مصرف اربیل 3 ملیارو 619 ملیۆن دۆلار، مصرف الشمال 3 ملیار و 916 ملیۆن دۆلار، مصرف كوردستان 1 ملیارو 961 ملیۆن دۆلار، مصرف جیھان 1 ملیار و 283 ملیۆن دۆلار".

هەر بەپێی راگەیەندراوەكە: "بەكۆی گشتی 10 ملیارو 781 ملیۆن دۆلار لەم چوار بانكەوە رۆشتووەتە دەرەوەی عیراق بەبێ ئەوەی ناوی ئەو كەسانە بوونی ھەبێت كە ئەو پارەیەیان ناردووە!".

PUKMEDIA