یەکێتی خۆی بە پارێزەری ئێزدیەکان دەزانێت

شەنگال

یەکێتیی نیشتمانیی کوردستان خۆی بە پارێزەری مافەکانی ئێزیدییەکان دەزانێت و لەهەرێم و عیراق و جیهانیش کاریان بۆ دەکات و بە هەوڵ و پێداگرییەکانی سەرۆک بافڵ جەلال تاڵەبانی توانرا کێشەی نیوسه‌ده‌ی ئێزدییه‌كان له‌هه‌رێمی كوردستان بۆ تاپۆکردنی موڵکوماڵیان لە زێدی خۆیان چارەسەر بکرێت و حکومەتی عیراق بڕیاری تاپۆکردنی زەویەکانیان بدات.

هەر لەو چوارچێوەیەشدا سەرۆک بافڵ جەلال تاڵەبانی سەرۆکی یەکێتیی نیشتمانیی کوردستان پێشوازی له‌ بڕیاره‌كه‌ی په‌رله‌مانی ئه‌ڵمانیا بۆ به‌جینۆساید ناساندنی كۆمه‌ڵكوژیی خوشك و برا ئێزیدییه‌كان دەکات و دەڵێت: "یه‌كێتیی نیشتمانیی كوردستان وه‌ك هه‌میشه‌ هاوكار و پشتیوان ده‌بێت له‌ پاراستنی ئێزدییه‌كان و كه‌لتووره‌ ره‌سه‌نه‌كه‌یان، وه‌كچۆن سه‌رسه‌ختانه‌ هه‌وڵ بۆ سۆراغ و گه‌ڕاندنه‌وه‌ی ئه‌و ئازیزانه‌مان ده‌دات كه‌ تاوه‌كو ئێستا چاره‌نووسیان نادیاره‌".

هەر لەو بارەیەوە غه‌یاس سورچی لێپرسراوی راگه‌یاندنی مه‌ڵبه‌ندی موسڵی یه‌كێتی له‌ لێدوانێكیدا بۆ سایتی ره‌سمی یه‌كێتیی نیشتمانیی كوردستان PUKMEDIA رایگه‌یاند: "كێشه‌ی زه‌وی و زاری ئێزدییه‌كان بۆ نزیكه‌ی 50 ساڵ له‌مه‌وپیش ده‌گه‌ڕێته‌وه‌، به‌ڵام له‌ئێستادا به‌هه‌وڵی سه‌رۆك بافڵ، سه‌رۆك وه‌زیرانی عیراق بڕیاری چاره‌سه‌ری ئه‌و كێشه‌یه‌ی ده‌كرد كه‌ ئه‌وەش باوه‌ڕی راسته‌قینه‌ی یه‌كێتییه‌ به‌مافی پێكهاته‌كان به‌گشتی و له‌ناویاندا ئێزدییه‌كان".

"له‌كۆتای ساڵی رابردوو به‌هه‌وڵی بافڵ جه‌لال تاڵه‌بانی دوای چه‌ندین دانیشتن له‌گه‌ڵ محه‌مه‌د شیاع سودانی سه‌رۆك وه‌زیرانی عیراق و هاوكات به‌هه‌وڵی نوێنه‌رانی یه‌كێتی له‌به‌غدا بڕیاردرا زه‌وی و زاره‌كانیان به‌ ره‌سمی به‌ناوی خوشك و برایانی ئێزدی بكرێن، كه‌له‌سه‌نته‌ری شه‌نگال و هه‌ردوو ناحیه‌ی تلعوزێر و سنونێ بێت"، سورچی وایوت.

لێپرسراوی راگه‌یاندی مه‌ڵبه‌ندی موسڵی یه‌كێتی ده‌شڵێت: "جێبه‌جێكردنی ئه‌م بڕیاره‌ بۆ ئێزدییه‌كان زۆر دڵخۆشكه‌ره‌و رێگایان بۆ خۆش ده‌كات زیاتر بگه‌ڕێنه‌وه‌ بۆ زێدی خۆیان، ته‌نانه‌ت بۆ ئه‌وانه‌ش كه‌له‌ ئه‌وروپا ده‌ژین".

"له‌ 12ی كانوونی یه‌كه‌می 2022 ئه‌نجومه‌نی وه‌زیرانی عیراق بڕیارێكی بۆ دۆزینه‌وه‌ی چاره‌سه‌رێكی گشتگیر و هه‌میشه‌یی بۆ ئێزدییه‌كانی شه‌نگال په‌سه‌ند كرد، به‌پێی بڕیاره‌كه‌ زه‌وییه‌كانیان له‌ 11 كۆمه‌ڵگه‌ی نیشته‌جێبوون تاپۆ ده‌كرێن له‌سه‌ر خاوه‌نه‌كانیان".

PUKMEDIA