كاروان گه‌زنه‌یی: سیاسه‌تی چه‌وتی حكومڕانی هه‌رێمی به‌م رۆژه‌ گه‌یاند

كاروان گه‌زنه‌یی

هه‌رێمی كوردستان به‌سیاسه‌تی چه‌وت و بیری ته‌سكی حزبی به‌ڕێوه‌ناچێت و ئه‌مجۆره‌ سیاسه‌ته‌ وایكردوه‌ خه‌ڵكی هه‌رێمی كوردستان و ته‌نانه‌ت لایه‌نه‌كانیش داوای راستكردنه‌وه‌ی ره‌وتی چه‌وتی حكومڕانی له‌هه‌رێمی كوردستان بكه‌ن، له‌وچوارچێوه‌یه‌شدا سه‌رۆك و تیمی یه‌كێتی له‌راگه‌یه‌نراوێكدا ئه‌وه‌ ده‌خه‌نه‌ڕوو:"چاوه‌ڕوان بووین بۆ یه‌كجار سه‌رۆكی حكومه‌ت وه‌ك سه‌رۆكی حكومه‌تی هه‌رێم قسه‌ بكات، چاوه‌ڕوان بووین په‌یامه‌كه‌ی ده‌ستپێشخه‌ری بێت بۆ چاككردنی دۆخی ژیانی هاووڵاتیان و كۆتایی هێنان به‌ كێشه‌كان، به‌ڵام ئه‌مجاره‌ش واده‌رنه‌چوو راگه‌یه‌ندراوه‌كه‌ی پڕه‌ له‌ چه‌واشه‌كاری".

كه‌مئه‌زموونی سه‌رۆكی حكومه‌ت هه‌رێمی چه‌قبه‌ستووكردوه‌

كاروان گه‌زنه‌یی ئه‌ندامی په‌رله‌مانی كوردستان له‌میانی به‌شداریكردنی له‌به‌رنامه‌ی پانۆرامای كه‌ناڵی كوردسات رایگه‌یاند: "له‌م دۆخه‌ چه‌قبه‌ستووه‌ی هه‌رێم به‌و هه‌موو كێشمه‌ كێشمی سیاسیی و دۆخی خراپی ئابوورییه‌وه‌، هه‌مووان چاوه‌ڕوان بووین سه‌رۆكی حكومه‌ت له‌ ئاستی به‌رپرسیاریه‌تی بێت، به‌ڵام واده‌رنه‌چوو كه‌م ئه‌زموونی مه‌سرور بارزانی سه‌رۆكی حكومه‌تی هه‌رێمی كوردستان وایكرد به‌یاننامه‌یه‌كی له‌و شێوه‌ بڵاوبكاته‌وه‌ كه‌ به‌ئاستێكی زمانه‌وانی نزم نووسراوه‌ و كه‌وتووه‌ته‌ تۆمه‌ت به‌خشینه‌وه‌".

" سه‌رۆكی حكومه‌ت به‌به‌رنامه‌ كاری له‌سه‌ر لاوازكردن و سزادانی سلێمانی كردوه‌، ئه‌مه‌ش بۆ یه‌كه‌مجاره‌ له‌حكومڕانی هه‌رێمی كوردستاندا بینیمان سه‌رۆكی حكومه‌تێك بیه‌ویت ناوچه‌یه‌ك لاواز بكات له‌به‌رده‌م ناوچه‌یه‌كی دیكه‌دا، ئێمه‌ له‌ناو هۆڵی په‌رله‌مان وتوومانه‌ كه‌ ئه‌م جۆره‌ ئه‌قڵییه‌ته‌ له‌هه‌رێمی كوردستان قبوڵناكه‌ین، چونكه‌ یه‌كگوتاری و یه‌كهه‌ڵوێستی هه‌رێم له‌ده‌ستده‌ده‌ین" كاروان گه‌زنه‌یی وای وت. 

بڕوا به‌سیناریۆی پاراستن ناكرێت

پاراستنی پارتی به‌مه‌به‌ست دۆسه‌ی شه‌هیدكردنی عه‌قید هاوكار جاف-ی به‌لاڕێدابرد، بۆ ئه‌وه‌ی سیاسه‌تی چه‌وتی حكومڕانی هه‌رێمی كوردستان له‌بیر خه‌ڵك ببه‌نه‌وه‌.

سه‌باره‌ت به‌ راده‌ستكردنی بكه‌رانی شه‌هیدكردنی عه‌قید هاوكار جاف، كاروان گه‌زنه‌یی وتی: "خه‌ڵكی كوردستان ئه‌و راستییه‌ باش ده‌زانن كه‌ ئێمه‌ دوای سیناریۆی دروستكراوی پاراستن و رووداوێك ناكه‌وین كه‌ پێش روودانی ئاماده‌كرابێت بۆ بڵاوكردنه‌وه‌، سه‌رۆكی فراكسیۆنی یه‌كێتی له‌ په‌رله‌مان داوای لێكۆڵینه‌وه‌ی كردووه‌ له‌ كه‌یسه‌كه‌ به‌شێوه‌یه‌كی بێ لایه‌ن، به‌ڵام ناكرێت و قبوڵكراو نییه‌ سه‌رۆكی ئه‌نجومه‌نی وه‌زیران خۆی رۆڵی حاكم ببینێت و بڕیاربدات كێ تاوانبار و تۆمه‌تباری دۆسیه‌كه‌یه‌".  

دژه‌تیرۆری یه‌كێتی نه‌بوایه‌ هه‌ولێر له‌ده‌ست داعشدابوو

كاروان گه‌زنه‌یی جه‌ختیشكرده‌وه‌:" سه‌رۆكی حكومه‌تی هه‌رێمی كوردستان به‌ بڕینی بودجه‌ی هێزه‌كانی دژه‌ تیرۆری یه‌كێتیی نیشتمانیی كوردستان و كه‌مكردنه‌وه‌ی نه‌سریه‌ی هێزه‌كانی 70 و گه‌مارۆخستنه‌سه‌ر سه‌ر هێزه‌ ئه‌منییه‌كانی یه‌كێتی ده‌یه‌وێت ده‌زگا ئه‌منییه‌كان لاواز بكات، له‌كاتێكدا باش ده‌زانن ئه‌گه‌ر دژه‌تیرۆری یه‌كێتی نه‌بوایه‌ ئێستا له‌بری ئومێد خۆشناو ئه‌بوبه‌كر به‌غدای پارێزگاری هه‌ولێر بوو، بۆیه‌ هیوادارین سه‌رۆكی حكومه‌ت واز له‌م هه‌ڵسوكه‌وته‌ نابه‌رپرسانه‌ بێنێت، چونكه‌ پێشتریش زۆر هه‌وڵدراوه‌ یه‌كێتی نه‌هێڵدرێت یان پجوك بكرێته‌وه‌، دواجار پیلانی دوژمنان خراوه‌ته‌ گۆڕو یه‌كێتیش رۆژدوای رۆژ به‌هێزتر بووه‌".

PUKMEDIA