سەرۆک بافڵ:چاوەڕێی خەمساردی حکومەت ناکەین

بافڵ جەلال تاڵەبانی، سەرۆکی یەکێتیی نیشتمانیی کوردستان لە بارەگای مەکتەبی سیاسی لەگەڵ سکرتاریەتی کۆمەڵەی پێشمەرگە کەمئەندامبووەکانی سەنگەر کۆبووەوە.

لە کۆبوونەوەیەکەدا کە شاڵاو عەلی عەسکەری، کارگێڕی مەکتەبی سیاسی و بورهان سەعید سۆفی، لێپرسراوی مەکتەبی شەهیدان و عەبدوڵا کانی بەردی، لێپرسراوی بۆردی تێکۆشەران ئامادەبوون، گفتوگۆ لەبارەی ئەرک و کاری رێکخراوەیی و داواکاریی پێشمەرگە کەمئەندامبووەکانی سەنگەر کرا و فواد عەبابەکر، سەرۆکی کۆمەڵەی پێشمەرگە کەمئەندامبووەکانی سەنگەر خواست و داواکارییەکانی کۆمەڵەکەی روونکردەوە.

لە درێژەی کۆبوونەوەکەدا سەرۆک بافڵ جەلال تاڵەبانی ستایشی تێکۆشانی بێوچان و قوربانیدانی کۆمەڵەکەی کرد لەمێژووی خەباتی گەلەکەمان و وتی، ئێوە بە خوێن بەرگریتان لە خاک و خەڵکی کوردستان کرد، بە ئەندازەی گەورەیی قوربانیدانەکانتان سوپاس و پێزانینتان ئاڕاستە دەکەم. ئێوە حەقێکی گەورەتان بەسەر یەکێتی و گەلەکەمانەوە هەیە و دەبێت خزمەت و وەفاداریمان لە ئاست بەخشینەکانتان بێت، وەک مام دەیفەرموو “ئێوە شەهیدی زیندوون“

سەبارەت بە داواکاری و پێداویستییەکانیشیان سەرۆک بافڵ بەڵێنیدا هەموو هەوڵێک لەوپێناوەدا بدەن و درێغی نەکەن. راشیگەیاند، شانازییەکی گەورەیە بۆ من لەخزمەت ئێوەدابم و کار بۆ بەدیهێنانی مافەکانتان بکەم. بەداخەوە تاوەکو ئێستا حکومەت و لایەنە پەیوەندیدارەکان وەک پێویست وەڵامدەرەوەی خواستەکانتان نەبوون، بۆیە جگەلەوەی لەڕێگەی نوێنەرەکانمانەوە لە پەرلەمانی کوردستان و عیراق دەبینە پارێزەری بەدیهێنانی مافەکانتان، وەک یەکێتیش چاوەڕێی خەمساردیی حکومەت ناکەین و بە چەند قۆناغێک داواکارییەکانتان جێبەجێ دەکەین و لە خزمەت ئێوەی شەهیدی زیندوودا دەبین.

PUKMEDIA