رێكخراوی LDSسەردانی دامەزراوەی سەرۆك جەلال تاڵەبانی دەكات

فۆتۆ.. دامەزراوەی سەرۆك جەلال تاڵەبانی

ئەمڕۆ 11-1-2023، رێكخراوی "LDS ی ئەمریكی سەردانی دامەزراوەی سەرۆك جەلال تاڵەبانی كرد لە سلێمانی، لە دیدارێكدا باڵیۆز د.محەمەد سابیر سەرۆكی دامەزراوەی سەرۆك جەلال تاڵەبانی رایگەیاند: "وەك دامەزراوەی سەرۆك جەلال تاڵەبانی چاومان لە پەیوەندی هاوبەشی بونیادنەرانەیە لە ئاستی ناوخۆو دەرەوە بەتایبەت لەگەڵ رێكخراو دامەزراوە هاوشێوەكان".

سەرۆكی دامەزراوە، باسی لەوەشكرد: "كە كارو بەرنامە و پلانی ئایندەی دامەزراوەی سەرۆك جەلال تاڵەبانی؛ بریتی دەبێت لە كاركردن لە بواری كلتوری و رۆشنبیری و یەكسانی خوازی جێندەری و ژینگەو پەرەدان بە زیادكردنی توانستی مرۆیی و رەخساندنی دەرفەت بۆ خوێندكارانی كارامەی هەرێم و عێراق لە دەرەوەی وڵات و بەرزكردنەوەی ئاستی زانستیان لە گشت بوارەكاندا، بۆ ئەومەبەستەش داوای لەوەفدی میوانكرد لە ئایندەی پلانی كاركردنی هاوبەش لەو بوارەدا رۆڵی خۆیان بگێڕن".

هەر لە كۆبوونەوەكەدا باڵیۆز د.محەمەد سابیر رایگەیاند: "بەو پێییەی سلێمانی پایتەختی رۆشنبیرییە دەكرێت زیاتر لە بواری كلتوری و رۆشنبیری و فەرهەنگی لەم شارەدا چالاكی بە پشت بەستن بە فەندی نێودەوڵەتی ریكخراوە نێودەوڵەتییەكان ئەنجام بدرێت".

دواتر سەرۆكی وەفدی رێكخراوی LDS ئەمریكی رایگەیاند: "وێرای خۆشحاڵیان بەسەردانیان بۆ شاری سلێمانی و دروستكردنی رایەڵەی پەیوەندی و هەماهەنگی لە چوارچێوەی پلانی كاری ئایندەی هاوبەش لەگەڵ دامەزراوەی سەرۆك جەلال تاڵەبانی-دا، دەخوازن لە قۆناغی ئایندەدا، بەشێوەیەكی رەسمی لێكتێگەیشتنی هاوبەش ئیمزا بكەن، بەمەبەستی زیاتر خزمەتكردن لە بوارەجیاكان لە رێگەی دامەزراوەی سەرۆك جەلال تاڵەبانییەوە".

PUKMEDIA