كاروان گەزنەیی: بەناوی هێزەكانی 80ی پارتییەوە رۆژانە چەندین بار داخڵی هەرێم دەكرێن

كاروان گەزنەیی ئەندامی پەرلەمانی كوردستان

ئەندامێكی پەرلەمانی كوردستان بەڵگەی وردی لەبارەی گەندەڵییەكانی هەردوو مەرزی حاجی ئۆمەران و ئیبراهیم خەلیلی ئاشكرا كرد و رایگەیاند، قاچاخچێتی بە دەرمانی شێرپەنجەوە كراوە.

كاروان گەزنەیی، ئەندامی پەرلەمانی كوردستان لە كۆنگرەیەكی رۆژنامەوانیدا رایگەیاند: "گەندەڵییەكی گەورە لە مەرزەكانی حاجی ئۆمەران و ئیبراهیم خەلیل دەكرێت و هەرچەندە بە یاسای هاوردەكردنی چیمەنتۆ قەدەغەیە، بەڵام رۆژانە لەلایەن كۆمپانیای خۆشناوەوە بۆ پڕ‌ۆژەیەكی نیشتەجێبوون چوار سایلۆ چیمەنتۆ هاوردە دەكرێت و یەك یەكە لەناو پڕ‌ۆژەكەشدا بە سێ ملیۆن دۆلار دەفرۆشرێتەوە".

باسی لەوەشكرد: "كۆدی سفر بۆ هاوردەكردن لەو مەرزانە بەناوی هێزەكانی 80ی پارتییەوەیە و رۆژانە چەندین بار كارتۆن داخڵ دەكرێن و كەس نازانێ چیان تێدایە و بارهەڵگرەكان بەپڕ‌ی دێن و دواتر بەبەتاڵی دەگەڕ‌ێنەوە، ئەمە جگە لەوەی ئێستا فێربوون دەچنە مەرزی وەلید لەوێوە قاچاخچێتی دەكەن بەهۆی ئەوەی چاودێری لەسەر نییە و داهاتی چەند بەرپرسێكی پێ زیاد دەكرێت".

ئەوەشی ئاشكراكرد: "دەرمانی شێرپەنجە بە قاچاخ و لەسەر ئەگزۆزی ئۆتۆمبێلی دەهێندرێت و دەرزی بەنج و نیو بەنجیش كەس نازانێ چۆن دەهێندرێت و لەسەر ماتۆڕ‌سكیل دەفرۆشرێت ئەمە جگە لەوەی پیشتر دۆسیەیەكمان داوەتە داواكاری گشتی كە وەزارەتی تەندروستی ستیكەری دەرمانی بەنایاسایی داوە بە كۆمپانیایەك و وەزارەتی شەهیدانیش بەنایاسایی گرێبەستی لەگەڵ رێكخراوێكی وەهمی كردووە، بەڵام تا ئێستا لە ئەندام پەرلەمانێكەوە بگرە تا ئەندامێكی سەركردایەتی نەچوونەتە بەردەم دادگا و هیوادارم ناچارنەبین پەنا بۆ دادگاكانی عیراق ببەین".

PUKMEDIA