به‌سه‌رۆكایه‌تی یه‌كێتی كێشه‌كانی شه‌نگال ده‌برێته‌ به‌غدا

وه‌فدێكی باڵای هاوبه‌شی پێكهاته‌كانی شه‌نگال به‌سه‌رۆكایه‌تی یه‌كێتی داواكارییه‌كان ده‌گه‌یه‌ننه‌ سێ سه‌رۆكایه‌تییه‌كه‌ی عیراق و پشتیوانیان لێده‌كرێت.

داود جوندی ئه‌ندامی سه‌ركردایه‌تی یه‌كێتیی نیشتمانی كوردستان، هاوكات سه‌رۆكی وه‌فدی ئێزدییه‌كان كه‌ سه‌ردانی به‌غدایان كردوه‌ به‌ سایتی ره‌سمی یه‌كێتیی نیشتمانیی كوردستان PUKMEDIA ی راگه‌یاند:" وه‌فدێكی باڵای ئێزدییه‌كان و مه‌سیحییه‌كان و توركمانه‌كان و نوێنه‌ری سوونه‌و شیعه‌و چه‌ند حزبێك به‌ سه‌رۆكایه‌تی یه‌كێتی سه‌ردانی به‌غدامان كردو چه‌ندین كۆبوونه‌وه‌ی گرنگمان له‌گه‌ڵ سه‌رۆك كۆمارو سه‌رۆك وه‌زیران و سه‌رۆكی په‌رله‌مان و چه‌ند لایه‌نێكی سیاسی ئه‌نجامدا".

" له‌درێژه‌ی سه‌ردانه‌كه‌ماندا سه‌ردانی چه‌ند وه‌زاره‌تێكمان كردو له‌وچوارشێوه‌یه‌شدا چاومان كه‌وت به‌ خالید شوانی وه‌زیری دادی عیراق و هه‌ندێك كێشه‌ی وه‌ك تۆماری خانووبه‌ره‌مان هه‌بوو به‌سوپاسه‌وه‌ بۆی چاره‌سه‌ر كردین" داود جوندی وای وت.

ده‌شڵێت:"هه‌ر سێ سه‌رۆكایه‌تییه‌كه‌ی عیراق و لایه‌نه‌ سیاسییه‌كانیش پشتیوانی داواكانی خه‌ڵكی شه‌نگال بوون به‌تایبه‌ت پشتیوانی بڕیاره‌كه‌ی ئه‌نجومه‌نی وه‌زیران بوون له‌باره‌ی تاپۆكردنی زه‌وی و زاری ئێزدییه‌كانی شه‌نگاو چه‌ند ناوچه‌یه‌كی دیكه‌".

ئه‌وه‌شی خسته‌ڕوو:" له‌به‌غدا ماوینه‌ته‌وه‌و له‌ رۆژانی داهاتوودا چه‌ند كۆبوونه‌وه‌یه‌كی دیكه‌مان له‌گه‌ڵ حزب و لایه‌نه‌ سیاسییه‌كان ده‌بێت".

PUKMEDIA