وه‌زیری داد راستییه‌كان بۆ ده‌سته‌ی ده‌ستپاكی ده‌خاته‌ڕوو

خالید شوانی، وه‌زیری دادی حكومه‌تی عیراق

وه‌زیری دادی عیراق رایگه‌یاند:" بڕیاره‌كه‌ی ده‌سته‌ی ده‌ستپاكی له‌سه‌ر وه‌زاره‌ته‌كه‌ی دووره‌ له‌ ڕاستییه‌وه‌و قبوڵی ناكه‌ین ناو و ناوبانگی وه‌زاره‌ته‌كه‌مان بشێوێنرێت".

خالید شوانی، وه‌زیری دادی حكومه‌تی عیراق له‌باره‌ی تۆمه‌تباركردنی له‌لایه‌ن ده‌سته‌ی ده‌ستپاكییه‌وه‌ رونكردنه‌وه‌ ده‌دات و رایگه‌یاند، بابه‌ته‌كه‌ په‌یوه‌ندی به‌ "ده‌ستپاكییه‌" نیه‌، ده‌شڵێت، "پێموایه‌ سه‌رۆكی ده‌سته‌ی ده‌ستپاكی په‌له‌ی كرد كه‌ ئه‌و كۆنفرانسه‌ رۆژنامه‌وانییه‌ی ئه‌نجامدا و سوكایه‌تی و ناوزڕاندنی وه‌زاره‌تی داد و وه‌زیری دادی تیابوو".

دوای ئه‌وه‌ی رۆژی 3-1-2023 ده‌سته‌ی ده‌ستپاكی عیراق به‌ تۆمه‌تی خراپ به‌كارهێنانی ده‌سه‌ڵاته‌كانی وه‌زیری دادی عێراق بانگهێشتكردبوو بۆ لێكۆڵینه‌وه‌ ، خالید شوانی وه‌زیری دادی عێراق له‌ كۆنگره‌یه‌كی رۆژنامه‌نوسیدا رایگه‌یاند، ئه‌و هه‌واڵانه‌ دوورن له‌ راستیه‌وه‌ و په‌له‌كراوه‌ له‌ بڵاوكردنه‌وه‌ی زانیارییه‌كان له‌لایه‌ن به‌ڕێوه‌به‌ری ده‌سته‌ی ده‌ستپاكی عیراقه‌وه‌ .

وتیشی:" بۆ ده‌رخستنی راستیه‌كان چووینه‌ته‌ به‌رده‌م دادگا و به‌ڵگه‌ی پێویستیان پێشكه‌شكردون و دۆسیه‌كه‌ په‌یوه‌ندی به‌ گه‌نده‌ڵییه‌وه‌ نییه‌".

ئاماژه‌ی به‌وه‌شكرد، "رۆژی 3ی ئه‌م مانگه‌ دوو لێكۆڵه‌ر له‌ ده‌سته‌ی ده‌ستپاكییه‌وه‌ هاتوون بۆ وه‌زاره‌تی داد و كاتێك ئێمه‌ له‌ كۆبونه‌وه‌ی ئه‌نجومه‌نی وه‌زیران بوین داوای جنسیه‌ی عیراقی چه‌ند فه‌رمانبه‌رێكیان كردوه‌ كه‌ په‌یوه‌ندیان به‌ گرێبه‌ستی به‌خوارده‌مه‌نییه‌وه‌ هه‌یه‌ كه‌ ده‌درێت به‌ زیندانییه‌كان، له‌به‌رئه‌وه‌ی سه‌عات 2:00 ئه‌و دوو لێكۆڵه‌ره‌ هاتوون و ده‌وام ته‌واوبووبوو، رێككه‌وتوون كه‌ رۆژی 4ی 1 بێنه‌وه‌و نوسراوه‌كانیان بدرێتێ كه‌ به‌ڕێوه‌به‌ری كارگێڕی و دارایی وه‌زاره‌تی داد زۆر هاوكاریان بووه‌".

ئاماژه‌ی به‌وه‌شكرد، "ئه‌وه‌ی به‌لای ئێمه‌وه‌ سه‌رسوڕهێنه‌ربوو سه‌رۆكی ده‌سته‌ی ده‌ستپاكی چووه‌ كۆنگره‌یه‌كی رۆژنامه‌وانی كردوه‌و ئێمه‌ی به‌وه‌ تۆمه‌تباركردوه‌ كه‌ رێگرین له‌وه‌ی ئه‌و به‌ڵگانه‌ پێشكه‌ش بكه‌ین و ئه‌و به‌ڵگانه‌ په‌یوه‌ندی به‌ گرێبه‌سته‌كانه‌وه‌ هه‌یه‌، له‌كاتێكدا نوسراوه‌كه‌ی دادگا كه‌ هاتووه‌ باس له‌ به‌ڵگه‌نامه‌ی جنسیه‌ی عیراقی ده‌كات، ئێمه‌ گوێمان به‌ بابه‌ته‌كه‌ نه‌داو رۆژی 4ی 1ی به‌پێی رێكاری یاسایی و ئیداری وه‌ڵامی ده‌سته‌ی نه‌زاهه‌مان داوه‌ته‌وه‌".

له‌ كۆتایدا وتی،"ئه‌وه‌ی روویداوه‌ بۆته‌ هۆی شێواندنی ناو و پێگه‌ی وه‌زیر و وه‌زاره‌ته‌كه‌شمان ئه‌وه‌ش قبوڵكراو نییه‌و به‌یاسا ئه‌و بابه‌ته‌ چاره‌سه‌ر ده‌كه‌ین."  

 PUKMEDIA