دامەزراوەی سەرۆك جەلال تاڵەبانی گەشە بەپەیوەندییەكانی دەدات

سەرچاوە: دامەزراوەی سەرۆک جەلال تاڵەبانی

باڵیۆز د. محەمەد سابیر سەرۆكی دامەزراوەی سەرۆك جەلال تاڵەبانی رۆژی دووشەممە لە بارەگای سەرەكی دامەزراوەکە لە سلێمانی، پێشوازی لە ئەنجومەنی بەرێوبردنی بنكەی بەڵگاندن و لێكۆڵینەوەی ژین كرد.

لە كۆبوونەوەیەكدا، باڵیۆز د.محەمەد سابیر سەرۆكی دامەزراوەکە رایگەیاند:" وەك دامەزراوەی سەرۆك جەلال تاڵەبانی؛ ئامانجمانە لە رێگەی فیكرو بیروبۆچون و دنیابینی سەرۆك مام جەلال خزمەتی بەرەوپێشچونی كۆمەڵگەی كوردستان و عێراق بكەین"

ئاشكراشیكرد: لە بەرنامەی دامەزراوە دایە؛ كاربكات لەبواری كلتوری و یەكسانیخوازی جێندەری و رۆشنبیری و پەرەدان و رەخساندنی دەرفەت بۆ خوێندن بۆ خوێندكاران لە دەرەوەی وڵات و گەشەدان بە پەیوەندی هاوبەش لەگەڵ دامەزراوە هاوشێوەكاندا و گەڵاڵەكردنی پرۆژەی هاوبەش.

باڵیۆز د.محەمەد سابیر روونیشیكردەوە:  لە بەرنامەی دامەزراوەدا هەیە كە لەم ساڵدا لە سەر ئاستی كوردستان و عیراق دیداری سەرۆك جەلال تاڵەبانی سازبكەین.

دواتر رەفیق ساڵح بەرێوبەری بنكەی ژین، خۆشحاڵی دەربری بە ئاڵوگۆری پەیوەندی لە نێوان بنكەی ژین و دامەزراوەی سەرۆك جەلال تاڵەبانی و سازكردنی پرۆتۆكۆڵێكی هاوبەش بۆ رێكخستنی بەرنامەی كاری ئایندەی دوولایەنە.

PUKMEDIA