حکومەتی هەرێم گرفت بۆ ناردنی 400 ملیارەکە دروست دەکات

کوردستان 11:05 AM - 2023-01-04

تا ئێستا حکومەتی هەرێم حساباتی ختامی نەناردوە بۆ عیراق و بەو هۆیەشەوە وەزیری دارایی بڕیاری داوە 400 ملیار دینارەکە بۆ هەرێم نەنێرێت و ئاشکرایە کە تیمی پارتی لە حکومەتی هەرێم و ئاڕاستەیەکی ئەو حزبە هۆکارن کە کێشەی بودجە و دارایی هەرێمی کوردستان لەگەڵ بەغدا چارەسەر نەکرێت.

 

کاروان یاروەیس بڕیاردەری فراکسیۆنی یەکێتیی نیشتمانیی کوردستان لە پەرلەمانی عیراق بە سایتی رەسمی یەکێتی PUKMEDIA ی راگەیاند: "وەزیری دارایی بەکەسێکی زۆر پیشەیی لە بوارەکەی خۆیدا ناسراوەو بەدەر لە یاسا و رێنماییەکان هیچ بڕە پارەیەک خەرج ناکات، ئەمەش وای کردوە بۆ ناردنی 400 ملیار دینارەکەی هەرێم بەپێی یاسا مامەڵە بکات".

 

"نەناردنی حساباتی ختامی لەلایەن حکومەتی هەرێمەوە بۆ بەغدا وایکردوە وەزیری دارایی بڕیار بدات ئەو 400 ملیار دینارەی کە سەرۆک وەزیرانی عیراق بڕیاری داوە بینێرێت بۆ هەرێم، رابگرێت، ئەمەش ئەوە دەگەیەنێت کە حکومەتی هەرێم خۆی کەمتەرخەم بوەو گرفتی بۆ ناردنی 400 ملیار دینارەکە دروستکردوە"، کاروان یاروەیس وایوت.

 

دەشڵێت: "یەکێک لە کێشەکانی تری نەناردنی 400 ملیار دینارەکە ئەوەیە کە حکومەتی هەرێمی کوردستان بە هیچ شێوەیەک هەماهەنگی لەگەڵ وەزارەتی دارایی عیراق ناکات و ئامادە نییە هیچ داتایەکی هەرێم پێشکەش بە وەزارەتی دارایی عیراق بکات".

 

PUKMEDIA