كاروان گەزنەیی بەڵگەكان لەبارەی داهات نەخستنە سەرهەژماری خەزێنەی سلێمانی بڵاودەكاتەوە

كاروان گەزنەیی ئەندامی پەرلەمانی كوردستان لە فراكسۆنی یەكێتی

پەرلەمانتارێكی یەكێتی ناوی ژمارەیەك فەرمانگە ئاشكرا دەكات كە داهاتەكانیان ناگەڕێنەوە بۆ خەزنەی سلێمانی و دەشڵێت: "ئەگەر قسەكانم راست نین، فەرموو لە بری روونكردنەوە با بڕۆینە دادگا".

كاروان گەزنەیی ئەندامی پەرلەمانی كوردستان لە فراكسۆنی یەكێتیی نیشتمانیی كوردستان لە نووسراوێكدا وەڵامی روونكردنەوەكەی وەزارەتی پەروەردە دەداتەوە و رایدەگەیەنێت: "ئەگەر قسەكانم راست نین، فەرموو لە بری روونكردنەوە با بڕۆینە دادگا و بەیانی سكاڵا تۆمار بكەن".

راشیدەگەیەنێت: "داهاتی فرۆشگاكان، كە تەنها خوێندنەگاكانی سابیس زیاترە لە 500 ملیۆن دینار، لە هەولێر وەردەگیرێت و گرێبەستەكانی لەوێ دەكرێن".
كاروان گەزنەیی ئەوەش رادەگەیەنێت كە داهاتی ئەم شوێنانەی خوارەوە بەشێكیان ناچێنە سەر حسابی خەزێنەكانی سلێمانی:

- سامانە سروشتییەكان، بەشی كانزاكان.
- بەشێكی داهاتی فەرمانگە فێدڕالییەكان، وەكو: ئیقامە، رەگەزنامە، پاسەپۆرت، كارتی نیشتیمانی.
- داهاتی كۆمپانیاكانی گەورە باجدەران.
- بەشێك لە داهاتەكانی وەزارەتی ئەوقاف وەك: حەج و عەمرە.
- رسوماتی مرور، وەكو نوێكردنەوەی مۆڵەتی پێشانگای ئۆتۆمۆبێل.
- داهاتی پشكنینی هەززەكان.
- وەزارەتی پەروەردە وەك: مۆڵەتی نوێكردنەوەی ساڵانەی خوێندنگە ئەهلییەكان، سزا و پشكنینەكان، سەرجەم داهات دایەنگە ناحكومییەكان.

لە كۆتایی وەڵامەكەشیدا كاروان گەزنەیی ئەندامی پەرلەمانی كوردستان رایدەگەیەنێت: "كەی پێویستی كرد دەیان بەڵگەی تر بڵاودەكەینەوە و ئامادەم لەسەر كۆی ئەمانە بچمە بەرەدەمی دادگا".

PUKMEDIA