سەرۆك بافڵ بۆ كونسوڵی فەڕەنسا: یەكێتی لەگەڵ یەكڕیزی ماڵی كوردە

بافڵ جەلال تاڵەبانی سەرۆكی یەكێتیی نیشتمانیی كوردستان و ئۆلیڤیێ دیكوتینێ كونسوڵی گشتیی فەڕەنسا لە ھەرێم

‎ بافڵ جەلال تاڵەبانی سەرۆكی یەكێتیی نیشتمانیی كوردستان پێشوازی لە ئۆلیڤیێ دیكوتینێ، كونسوڵی گشتیی فەڕەنسا لە ھەرێمی كوردستان كرد و رایگەیاند: "دەمانەوێت لەگەڵ هێزە كوردستانییەكان بگەینە پڕۆژەیەكی هاوبەش بۆ بەڕێوەبردن" .

‏‎لە دیدارێكدا دوایین گۆڕانكارییە سیاسییەكان و كۆبوونەوەی لوتكەی نێوان لایەنە سیاسییەكانی هەرێم لە هاوینەهەواری دوكان و هێز و لایەنە سیاسییەكانی عیراق لە ماڵی مام لە بەغدا گفتوگۆیان لەبارەوەكرا. جەخت لە پەرەپێدانی پەیوەندییەكان و بەردەوامی گفتوگۆ نیشتمانییەكان كرایەوە لەپێناو چارەسەركردنی كێشەكان و هەنگاونان بە ئاڕاستەی سەقامگیری و تەبایی لەنێوان لایەنەكاندا.

‏‎سەرۆك بافڵ جەلال تاڵەبانی لەبارەی دۆخی هەرێم و كۆبوونەوەكەی هاوینەهەواری دوكانەوە وتی، كۆبوونەوەكە سەلمێنەری ئەو راستییە بوو كە ئێمە لەگەڵ یەكڕیزی و تەبایی نێو ماڵی كورد و هەڵگرتنی بەرپرسیارێتین لەم قۆناغە هەستیارەدا. یەكێتی باوەڕی تەواوی بە هاوبەشیی راستەقینەیە و دەمانەوێت لەگەڵ هێزە كوردییەكان بگەینە پرۆژەیەكی نیشتمانیی هاوبەش بۆ بەڕێوەبردن و خزمەتكردنی خەڵكەكەمان، كە ئەمەش لە خزمەت بەهێزتركردنی قەوارەی هەرێم دەبێت.

 PUKMEDIA