چلەی ماتەمینی فەریق روكن نەوشیروان فوئاد مەستی بەڕێوەدەچێت

فەریقی یەكەم نەوشیروان فوئاد مەستی

چلەی ماتەمینی فەریق روكن نەوشیروان فوئاد مەستی بە ئامادەبوونی لێپرسراوانی حكومی و حزبی و خێزان و خانەوادە و هاوڕێ و هاوسەنگەرانی لە هۆڵی تەوار لە سلێمانی بەڕێوەچوو.

لەسەرەتای مەڕاسیمەكە بورهان سەعید سۆفی ئەندامی مەكتەبی سیاسی یەكێتی وتاری مەكتەبی سیاسی یەكێتیی نیشتمانیی كوردستانی خوێندەوە و رایگەیاند: "فەریق روكن نەوشیروان فوئاد مەستی نموونەیەكی باڵای نێو كۆڕی خەباتی رزگاریخوازی گەلەكەمان بوو، شارەزایی و ئەكادیمی بوونی لە بواری سەربازیدا لە سەرجەم ئەو پێگانەدا رەنگیدابووەوە كە كاری تێكدا دەكردن، كۆچكردوو رۆڵی گرنگی گێڕاوە لە بەدامەزراوەیی كردنی هێزی پێشمەرگەی كوردستان و سكرتاریەتی سەرۆك مام جەلال و داڕشتنی سیستمی كۆلێژ سەربازی قەڵاچوالان و كۆلێژ ئەركانی كوردستان و دامەزراندنی هێزی پێشمەرگەی پشتیوانی دوو".

راشیگەیاند: "لەسەر دەستی فەریق روكن نەوشیروان فوئاد مەستی سەدان سەركردە و فەرماندە و كادیری سەربازی پەروەردەكراون كە تا ئەم ساتە ژمارەیەكی زۆریان شەهید بوون و چوونەتە نێو كاروانی نەمرانەوە لەپێناو پاراستنی سەنگ و پێگەی یەكێتی نیشتمانیی كوردستان و گەلەكەمان".

هەر لە مەڕاسیمەكەدا وەستا رەسوڵ لێپرسراوی ئەنجومەنی مەڵبەندی رێكخستنی پێشمەرگە، وتاری هاوبەشی مەڵبەندی رێكخستی پێشمەرگە و فەرماندەیی هێزەكانی 70 و هێزەكانی پشتیوانی دووی خوێندەوە و رایگەیاند: فەریق روكن نەوشیروان فوئاد مەستی لەنێو هێز پێشمەرگەدا زۆر سیفاتی جیاوازی هەبوو، لە فێربوونی ئەلف و بێی سەربازیدا هەموومان قەرزداری ئەوین".

رۆژی 20-10-2022، فەریقی یەكەم نەوشیروان فوئاد مەستی لە تەمەنی 81 ساڵیدا كۆچی دوایی كرد، رۆژی21-10-2022، بە ئامادەبوونی بافڵ جەلال تاڵەبانی، سەرۆكی یەكێتیی نیشتمانیی كوردستان و فەرماندە و ئەفسەرانی باڵای ھێزەكانی حەفتا و ژمارەیەك لە ئەندامانی سەركردایەتی، لە بارەگای فەرماندەی ھێزەكانی حەفتا لە مەراسیمێكی پڕشكۆ، سەربازی و شایستە بە رۆڵی و مێژووی خەباتی، تەرمی فەریقی یەكەمی روكن (نەوشیروان فوئاد مەستی) تێكۆشەری ناسراوی یەكێتیی نیشتمانیی كوردستان و دۆستی نزیكی سەرۆك مام جەلال بەرێزەوە بەرەوە دوامەنزڵی بەڕێكراو لە گردی سەلیم بەگ لە سلێمانی بەخاكسپێردرا.

PUKMEDIA