چله‌ی شه‌هید نه‌قیب زوهێر به‌ڕێوه‌چوو

چلەی ماتەمینی شەهید نەقیب زوهێر محەمەد

به‌ ئاماده‌بوونی خێزان و كه‌سوكار و هاوخه‌بات و ژماره‌یه‌كی زۆر له‌ هاوڕێیانی ئه‌مڕۆ سێ شه‌ممه‌، له‌شاری سلێمانی لەهۆڵی رۆشنبیری، چله‌ی ماته‌مینی شه‌هید نه‌قیب زوهێر به‌ڕێوه‌چوو.

وه‌ستا ره‌سوڵ لێپرسراوی مه‌ڵبه‌ندی پێشمه‌رگه‌ له‌ وتارێكدا كه‌ له‌ مه‌راسیمه‌كه‌دا پێشكه‌شی كرد رایگه‌یاند: "ئه‌مڕۆ 40 رۆژه‌ فرمێسكی خه‌م له‌چاومان ده‌بارێت بۆ له‌ده‌ستدانی فه‌رمانده‌یه‌كی گه‌نج و هه‌ڵكه‌وتوو"، وتیشی " ئه‌وه‌ی به‌ده‌ستهاتووه‌ و له‌ داهاتووشدا به‌ده‌ستدێت  له‌سایه‌ی خوێنی شه‌هیده‌كانه‌وه‌یه‌، میلله‌ته‌كه‌ی ئێمه‌ خاوه‌نی ئه‌م ئیراده‌یه‌ و هه‌رگیز له‌بننایه‌ت".
"یه‌كێتیی نیشتمانیی كوردستان كاروانێكی گه‌وره‌ی شه‌هیدانی به‌ڕێخستووه‌، بۆ گه‌یشتن به‌ ئامانجه‌كانمان، یه‌كێتی و رۆڵه‌ قاره‌مانه‌كانی سنگیان به‌ گولله‌وه‌یه‌، یه‌كێتی خاوه‌نی ئه‌و ژماره‌ شه‌هید و تێكۆشه‌رانه‌ بێت، خه‌یاڵیان خاوه‌ ئه‌وانه‌ی گره‌و له‌سه‌ر كه‌وتنی یه‌كێتیی نیشتمانیی كوردستان ده‌كه‌ن"، وه‌ستا ره‌سوڵ وایوت.

پاشان وتاری بنه‌ماڵه‌ له‌ لایه‌ن محه‌مه‌د زه‌نگه‌نه‌ باوكی شه‌هید نه‌قیب زوهێره‌وه‌ پێشكه‌شكراو سوپاسی سه‌رۆك بافڵ و هه‌موولایه‌كی كردوو راگه‌یاند: "به‌ئاماده‌بوون و هاوخه‌میتان له‌ ئازاری ئێمه‌تان كه‌مكرده‌وه‌.
وتیشی: "کە هەواڵەکەم پێگەشت و سەرۆک بافڵ-م بینی، پێیوتم تەنها کوڕی تۆ نییە، کوڕی منیشە، بەڕاستی سەلماندی کوڕی سەرۆک بافڵ و یەکێتیی نیشتمانیی کوردستانە.

عه‌قید حه‌یده‌ر به‌ناوی فه‌رمانده‌یی كۆماندۆی هێزه‌كانی كوردستان وتارێكی پێشكه‌شكردو رایگه‌یاند: "ئه‌مڕۆ یادی 40 رۆژه‌ی شه‌هیدێكی قاره‌مانی گه‌له‌كه‌مان ده‌كه‌ینه‌وه‌ كه‌ هیچ وشه‌ و په‌یامێك ناتوانێت به‌ته‌واوی وه‌سفی قاره‌مانێتی ئه‌و شه‌هیده‌مان بكات، ده‌ست له‌سه‌ر سنگ و به‌ دڵێكی پڕ له‌تۆڵه‌ یادی شه‌هیدی فه‌رمانده‌ نه‌قیب زوهێر ده‌كه‌ینه‌وه‌، وه‌ك هاوڕێ و هاوسه‌نگه‌ر و وه‌كو هێزی كۆماندۆی كوردستان پرسه‌و و سه‌ره‌خۆشی خۆمان ئاڕاسته‌ی بنه‌ماڵه‌ی شه‌هید ده‌كه‌ین و جارێكیتر به‌ڵێن دووپات ده‌كه‌ینه‌وه‌ كه‌ له‌سه‌ر رێگاو رێبازی شه‌هید زوهێر درێژه‌ به‌ خه‌بات و تێكۆشان بده‌ین".

رۆژی 19-10-2022، ھێزێكی سه‌ر به‌ فه‌رمانده‌یی ھێزه‌كانی كۆماندۆ بۆ ئه‌نجامدانی ئۆپه‌راسیۆنێك له‌دژی تیرۆرستانی داعش له‌ سنووری ناحیه‌ی زینانه‌، بۆمب و مینی چێندراو به‌ ئۆتۆمبێله‌كانی ھێزه‌كه‌دا ته‌قییه‌وه‌و له‌ ئه‌نجامدا نه‌قیب زوھێر محه‌مه‌د شه‌ھید بوو، هه‌روه‌ها ئاكام عومه‌ر فه‌رمانده‌ی ھێزه‌كانی كۆماندۆ و چه‌ند پێشمه‌رگه‌یه‌كی دیكه‌ش بریندار بوون.