سەرۆك بافڵ و باڵیۆزی ئەمریكا: حكومەتی هەرێم مامەڵەی نابەرپرسیارانە دەكات

بافڵ جەلال تاڵەبانی سەرۆكی یەكێتیی نیشتمانیی كوردستان و ئەلینا رۆمانۆسكی، باڵیۆزی ئەمریكا لە عیراق

بافڵ جەلال تاڵەبانی، سەرۆكی یەكێتیی نیشتمانیی كوردستان و ئەلینا رۆمانۆسكی، باڵیۆزی ئەمریكا لە عیراق لە ماڵی مام لە بەغدا كۆبوونەوە.

لە دیدارێكدا گفتوگۆ لەبارەی هەوڵەكانی حكومەت و هەنگاوەكانی سەرخستنی پرۆسەی چاكسازی كرا و پشتیوانی لایەنەكان بۆ جێبەجێكردنی كارنامەی حكومەت جەختیلێكرایەوە.

سەرۆك بافڵ باسی لە گرنگی و پێویستی یەكدەنگی نێوان هێز و لایەنە سیاسییەكان كردەوە بۆ جێبەجێكردنی بەرنامەی ‌حكومەتی نوێ و وتی، پێشكەشكردنی خزمەتگوزاری و چەسپاندنی یاسا لە گرنگترین كارەكانی حكومەتە و چارەسەركردنی كێشەكانی نێوان هەرێم و بەغداش هەر لەو چوارچێوەیەدایە.

ئەزموونی حوكمڕانی و ناكۆكییەكانی نێوان لایەنە سیاسییەكان لە هەرێمی كوردستان تەوەرێكیتری گفتوگۆكان بوو، سەرۆك بافڵ راشكانەوە هەڵوێستی یەكێتی و خراپی دۆخی هاوڵاتییانی لە سنووری پارێزگاكانی سلێمانی، هەڵەبجە، ئیدارەی راپەڕین و گەرمیان روونكردەوە و رایگەیاند، بەداخەوە حكومەتی هەرێمی كوردستان مامەڵەیەكی ناتەندروست و نابەرپرسیارانە لەگەڵ ئەو ناوچانە دەكات، بەشێوەیەك كە خزمەتگوزارییەكان لە ئاستێكی زۆر نزمدان و هاوڵاتییان هەست دەكەن سزادەدرێن.

سەرۆك بافڵ ئاماژەی بەوەشكرد، یەكێتیی نیشتمانیی كوردستان خۆی بە خاوەنی ئەم ئەزموونە دەزانێت و لە هیچ هێز و لایەنێكی قبووڵ نەكردووە و نایكات كە خەڵكەكەی وەك هاوڵاتی پلەدوو سەیربكرێت، گەمارۆی سیاسییان بخرێتەسەر و وەك كارتێكی فشاری سیاسی بەرامبەرمان بەكاربهێنرێت. بەداخەوە حكومەت بیر لە دەرئەنجامە خراپەكانی ئەم سیاسەتە ناتەندروستە ناكاتەوە و ئەم پەیامەشمان بە هەموو نێردە سیاسییەكان و حزبە كوردستانییەكان راگەیاندووە. سەرباری ئەوانەش ئێمە داوامانكردووە هەر رێكارێكی یاسایی یاخود سیستمێكی جیهانی كە هەیە بۆ كۆكردنەوەی داهات بەشێوەیەكی دادگەرانە، لێرە جێبەجێبكرێت تاوەكو هەموو هاوڵاتییانی هەرێم سوودمەندبن.

PUKMEDIA