سەرۆک بافڵ و د.لەتیف و پلاسخارت: بەدەستور کێشەکانی هەرێم و بەغدا چارەسەر بکرێت

بافڵ جەلال تاڵەبانی، د.لەتیف رەشید، جێنین پلاسخارت،

بافڵ جەلال تاڵەبانی، سەرۆکی یەکێتیی نیشتمانیی کوردستان و د.لەتیف رەشید، سەرۆککۆماری عیراق و جێنین پلاسخارت، نوێنەری تایبەتی سکرتێری گشتیی نەتەوە یەکگرتووەکان لە عیراق لە ماڵی مام لە بەغدا کۆبوونەوە.

"حكومەتی نوێ بە پەلە پێكبهێنرێت"

لە کۆبوونەوەکەدا دۆخی گشتیی وڵات، پەلەکردن لە پێکهێنانی حکومەتی نوێ، پێشکەشکردنی خزمەتگوزاری زیاتر و تێپەڕاندنی ئەو دۆخە سیاسییە چەقبەستووەی عیراقی تێکەوتووە تاوتوێکران.

"تەواوكردنی رێكاری یاسایی و دەستوورییەكان و دروستكردنی حكومەتێكی خزمەتگوزار"

کۆبوونەوەکە جەختی لە گفتوگۆی نیشتمانی نێوان لایەنەکان کردەوە بۆ تەواوکردنی رێکارە یاسایی و دەستوورییەکان و دروستکردنی حکومەتێکی بەهێز و خزمەتگوزار کە وەڵامدەرەوەی خواستی هەمووان بێت و ببێتە مایەی سەقامگیری سیاسی، ئابووری و کۆمەڵایەتی و پارێزەری مافی هەموو گەلانی عیراق بێت.

"دامەزراوە دەستوورییەكان دوور لە جیاكاری كار بۆ چارەسەری كێشەكانی هەرێم و بەغدا بكەن"

لە کۆبوونەوەکەدا ھەرسێ لایەن پەرۆشی خۆیان بۆ بەهێزکردنی پایەکانی دەوڵەتداری، چەسپاندنی دەسەڵاتی دادوەری و فەراهەمکردنی ژینگەیەکی لەبار بۆ رووبەڕووبوونەوەی گەندەڵی و رێگریکردن لە بەهەدەردانی سامانی گشتی دەربڕی. داواشکرا دامەزراوە دەستوورییەکان دوور لە جیاکاری خزمەتی هەموولایەک بکەن و کار بۆ چارەسەرکردنی کێشەکانی نێوان هەرێم و بەغدا بکەن.

بافڵ جەلال تاڵەبانی، سەرۆکی یەکێتیی نیشتمانیی کوردستان جەختی لە چارەسەرکردنی کێشەکانی نێوان هەرێم و بەغدا لەسەر بنەمای دەستوور کردەوە و رایگەیاند، نابێت جارێکیتر بەرژەوەندییەکانی خەڵک و پرسە نەتەوەیی و نیشتمانییەکان تێکەڵی ململانێ سیاسییەکان بکرێت. پێویستە رێچکەی سەرۆک مام جەلال بگرینەبەر و گفتوگۆ و دیالۆگ بکرێنە بنەمای چارەسەرکردنی کێشەکان.‌‎
‌‎

PUKMEDIA