عەممار حەكیم: پیرۆزبایی نوێنەرایەتی یەكێتی دەكەین لەسەرۆكایەتی كۆمار

عەمار حەکیم

عەممار حەكیم سەرۆكی رەوتی حیكەی نیشتمانی بەبۆنەی سەركەوتنی دكتۆر لەتیف رەشید لەهەڵبژاردنی سەرۆكایەتی كۆمار، لەماڵپەڕی تایبەتی خۆی پەیامێكی بڵاوكردەوە و پیرۆزبایی لەیەكێتیی نیشتمانی كوردستان و دكتۆر لەتیف رەشید كرد و رایگەیاند: "چاوەڕوانی هەموو هەنگاوێكی باش لە دكتۆر لەتیف رەشید سەرۆك كۆماری نوێی عێڕاق دەكەن".

لەخوارەوە دەقی پەیامەكەی عەممار حەكیم بڵاودەكەینەوە:

"پیرۆزبایی لە گەلی عێڕاق دەكەم كە ئارامییان لەبەرانبەر گرێكوێرەی سیاسی و كێشەكانی پێكهێنانی حكومەت درێژەی كێشا كە ئەمڕۆ هەنگاوێكی دەستوری لەپرۆسەی سیاسیی لەئەنجومەنی نوێنەران بەئاڕاستەی پێكهێنانی حكومەتی نوێی عێڕاق لەنمایشێكی تەواو دیموكراسیدا ئەنجامدرا، هەروەها پیرۆزبایی لە یەكێتیی نیشتمانیی كوردستان و فەخامەتی دكتۆر لەتیف رەشید دەكەین بەبۆنەی هەڵبژاردنی بە سەرۆك كۆماری عێڕاق، چاوەڕوانی هەموو هەنگاوێكی باش لەفەخامەتی سەرۆك كۆمار دەكەین لە پاراستنی دەستور و تەواوكردنی ئەو هەنگاوانەی لەپێشتردا كاریان لەسەر كراوە، هیوادارین قۆناغی سەرۆكایەتی بەرێزیان هاوبەشی و راگرتنی هاوسەنگی بێت لەنێوان سێ دەسەڵاتەكە و هەروەها هانی لایەنە سیاسییە جیاواز و ناكۆكەكان بدات كە بەگیانی یەك تیم لەخزمەت بەهێزكردنی رەوتی دیموكراسی خزمەت بكەن، لەم بۆنەیەدا رۆڵی نیشتمانیی و گەورەی دكتۆر بەرهەم بەرز دەنرخێنین لەو قۆناغەی پۆستی سەرۆكایەتی كۆماری لەئەستۆدابوو".

PUKMEDIA