وتەبێژی فراكسیۆنی یەكێتی: زۆربەی فراكسیۆنە عیراقییەكان پشتیوانی كاندیدەكەی یەكێتین

وتەبێژی فراكسیۆنی یەكێتی لە ئەنجومەنی نوێنەران رایدەگەیەنێت، "زۆربەی فراكسیۆنە عیراقییەكان پشتیوانی كاندیدی یەكێتین بۆ پۆستی سەرۆك كۆمار و كۆبوونەوەكانی سەرۆك بافڵ لەگەڵ لایەنە عیراقییەكان كاریگەری باشی لەسەر ئەنجامدانی دانیشتنەكەی ئەمڕۆ هەیە".

بڕیارە پێشنیوەڕۆی ئەمڕۆ 13-10-2022 ئەنجومەنی نوێنەرانی عیراق بۆ هەڵبژاردنی سەرۆك كۆمار كۆببێتەوە و تێیدا نوێنەران دەنگ لەسەر كاندیدانی پۆستی سەرۆك كۆمار بدەن، لەوبارەیەوە سۆزان مەنسور وتەبێژی فراكسیۆنی یەكێتیی نیشتمانیی كوردستان لە ئەنجومەنی نوێنەرانی عیراق بە سایتی رەسمی یەكێتی PUKMEDIA ی راگەیاند: "زەمینەیەكی لەبار بۆ دانیشتنی ئەمڕۆی ئەنجومەنی نوێنەران رەخسێندراوە و ئەو كۆبوونەوانەی بافڵ جەلال تاڵەبانی سەرۆكی یەكێتی لەگەڵ لایەنە سیاسییە عیراقییەكان ئەنجامیدا كاریگەری زۆر باشیان لەسەر ئەنجامدانی دانیشتنەكەی ئەمڕۆ هەیە".

"زۆربەی فراكسیۆنە عیراقییەكان هاوسۆز و پشتیوانی یەكێتیی نیشتمانیی كوردستانن لە سەرخستنی كاندیدەكەی كە د.بەرهەم ساڵح-ە، هەرچەندە پێدەچێت دانیشتنەكە دوابكەوێت بەڵام هەوڵی زۆر هەیەی بۆ ئەوەی لەكاتی خۆیدا ئەنجامبدرێت" سۆزان مەنسور وایوت.  

هەڵبژاردنی سەرۆك كۆماری عیراق پێویستی بە ئامادەبوونی 220 ئەندامی ئەنجومەنی نوێنەرانە و زیاتر لە 40 كاندید كێبڕكی لەسەر ئەو پۆستە دەكەن.

PUKMEDIA