بەرەو ھەڵوەشاندنەوەی رێكەوتننامەی لۆزان

بەر لە سەد ساڵ لە یەكێك لە شارە ھەرە جوانەكانی سویسرا رێكەوتنێك دژ بە گەلی كورد ئیمزا كرا كە بووە ھۆی سەرھەڵدانی  شۆڕش و خەبات و بەرخۆدانی نەپچڕاوەی گەلەكەمان. 

وڵاتانی سەركەوتووی جەنگی جیھانی یەكەم دەستیان تێكەڵ كرد لەگەڵ وڵاتانی ئیقلیمی و رێكەوتنی سێڤریان ھەڵوەشاندەوە.

بەبێ ئامادەبوونی كورد و بێ پرس پێكردنی، خاك و نیشتمانیان چوار بەش كرد.

لە ھەمان ھۆڵ و دوای ساڵێك كەمتر لە سەد ساڵ بەشدار بووین لە سەرپەرشتیكردنی كۆنفرانسێك بە ئامانجی ئامادەكاریی بۆ قۆناغێكی نوێ لە خەبات نەك پێچەوانەوەی گەلەكەمان.

یەكێتیی نیشتمانیی كوردستان پشتیوانی خەباتی مەدەنی و سیاسی گەلەكەمانە لە ھەموو پارچەكانی كوردستان. 

یەكێتی بەسەرپەرشتی سەرۆك بافڵ جەلال تاڵەبانی خەبات دەكات بۆ راستكردنەوەی ھەڵەكانی مێژوو. 

لە لۆزان و لەو ھۆڵەی ئەو رێكەوتنە نەگریسە دژ بە گەلەكەمان ئیمزا كرا، سیاسەتی یەكێتیی نیشتمانیی كوردستانمان خستەڕوو و بۆچوونی سەرۆك بافڵ جەلال تاڵەبانی لەسەر پشتگیریكردنی خەباتی مەدەنی و سیاسی گەلەكەمان.

لەم قۆناغە تازەیەدا لەگەڵ ھێزو لایەنە كوردستانییەكان تێدەكۆشن بۆ گەیاندنی پەیامی گەلەكەمان بەناوەندەكانی جیھان و سەلماندنی رەوایەتی خەباتەكەمان بۆ بەدیھێنانی مافەكانمان.

بۆ ئێمەی كورد قۆناغێكی نوێ دەستپێدەكات.

میللەتەكەمان چەندەھا حزب و رێكخراوی جیاجیای تێدایە بە ئایدۆلۆجیای جیاواز و بۆچوونی جیاوازەوە، بەڵام ھەموو لەسەر ئازادی نەتەوەكەمان و پارستنی كەلتوری كوردی كۆكن و ھاوڕان.

ئەمە دەبێت بكرێتە بنەمای خەباتمان.

با ھاوبەشییەكانمان كۆمانكاتەوە نەوەك جیاوازییەكانمان پەرتمان بكات.

بڵێسە جەبار فەرمان
PUKmedia تایبەت