روسیا و ئۆکراین رێککەوتنێک بۆ هەناردەکردنی دانەوێڵە ئیمزا دەکەن

لە وڵاتی تورکیا، ئەمڕۆ هەینی روسیا و ئۆکراین رێککەوتنی هەناردەکردنی دانەوێڵە ئیمزا دەکەن.

به‌ ئاماده‌بوونی سكرتێری گشتی نه‌ته‌وه‌ یه‌كگرتووه‌كان و سه‌رۆكی تورکیا، به‌رپرسانی روسیا و ئۆكراین، ئه‌مڕۆ هه‌ینی له‌ شاری ئیستانبوڵی تورکیا، مه‌راسیمی ئیمزاکردنی رێكکه‌وتنی نێوان روسیا و ئۆكراین له‌ باره‌ی ده‌ستكردنه‌وه‌ به‌ هه‌نارده‌كردنی دانه‌وێڵه‌ی ئۆکراین بۆ جیهان ئەنجام دەدەن.

وڵاتی تورکیا رۆژی 13ی مانگی 7، میوانداری کۆبوونەوەیەکی کرد کە بەرپرسانی ئۆکراین و روسیا و نەتەوە یەکگرتووەکانیش ئامادەبوون، تیایدا گفتوگۆ کرا دەربارەی ناردنی دانەوێڵەی ئۆکراین بۆ جیهان.

وتەبێژی وه‌زاره‌تی ده‌ره‌وه‌ی ئه‌مریكا رایگه‌یاند: پێشوازی له‌م رێكکه‌وتنه‌ ده‌كه‌ین، به‌رپرسیارێتی رووسیایه‌ رێكه‌وتنه‌كه‌ جێبه‌جێ بكات و رێگه‌ به‌ دانه‌وێڵه‌ی ئۆكراین بدات بگاته‌ بازاڕه‌كانی جیهان.

وتیشی‌: روسیا به‌ ئه‌نقه‌ست رێگری له‌ هه‌نارده‌ی دانه‌وێڵه‌ی ئۆكراین كرد، ئه‌وان خۆراكیان وه‌ك چه‌ك دژی جیهان به‌كارهێنا، ده‌بوایه‌ له‌سه‌ره‌تاوه‌ نه‌گه‌ین به‌و ئاسته‌ی ئێستا.

ئاماژەی بەوەشدا: ده‌قی رێكکه‌وتنه‌كه‌مان بینیوه‌، بۆ ئه‌م قۆناغه‌ گرنگه‌.

ئه‌م رێكکەوتنه‌ بۆ ناردنی بیست ملیۆن تۆن دانه‌وێڵه‌ی ئۆكراین دەکرێت لە بەندەرەکانی ئەو وڵاتەوە، ئه‌مڕۆ له‌ توركیا رێککەوتنەکە ئیمزا ده‌كرێت.

PUKmedia ئاژانسەکان