لوتكەی سێ قۆڵی توركیا-ئێران–روسیا لە تاران بەڕێوەچوو

كەمێك پێش ئێستا لوتكەی سێ قۆڵی توركیا - ئێران - روسیا لە تاران كۆتایی هات و هەرسێ وڵات رایانگەیاند، كێشەكانی سووریایان تاوتوێ كردووە و كار بۆ روبەڕوبوونەوەی تیرۆر لە ناوچەكە دەكەن.

دوابەدوای كۆتایی هاتنی لوتكەی سێ قۆڵی توركیا - ئێران - روسیا لە تاران، لە كۆنگرەیەكی رۆژنامەوانیدا ئیبراهیم رەئیسی سەرۆك كۆماری ئێران رایگەیاند: هێرشەكانی ئیسرائیل لە سووریا پێچەوانەی یاسای نێودەوڵەتین و بەردەوام دەبین لە پشتیوانیكردنی حكومەتی سووریا راشیگەیاند، دەتوانین بە هاوئاهەنگی بگەینە چارەسەر بۆ كێشەی سووریا.

هاوكات ڤلادمیر پۆتن سەرۆكی روسیا رایگەیاند: پابەندین بە پاراستنی یەكچارچەیی خاكی سووریا، هاوكات بیروبۆچوونمان لەبارەی سووریا و پرسی بەرەنگاربوونەوەی داعش و تیرۆر لە وڵاتەكە ئاڵوگۆڕ كرد.

راشیگەیاند: وەزیرانی دەرەوەمان كار لەسەر لێكتێگەیشتنەكان دەكەن و پێویستە رۆژهەڵاتی فوڕات بكەوێتە ژێر دەسەڵاتی حكومەتی سووریا.

هەر لە كۆنگرە رۆژنامەوانییەكەدا رەجەب تەیب ئەردۆغان سەرۆك كۆماری توركیا رایگەیاند: هەموو هەوڵێك دەدەین بۆ چارەسەركردنی كێشەی سووریا و  دەبێت هەنگاوی كردەیی بنێین بۆ پاراستنی سەقامگیری لەو وڵاتە.

راشیگەیاند: بەردەوام دەبین لە قەڵاچۆكردنی گروپ و رێكخراوە تیرۆرستییەكان چونكە پێویستە ئەو نا سەقامگیرییە نەهێڵرێت كە بەهۆی كێشەی سووریاوە دروست بووە.

PUKmedia