ژنێكی كورد خەڵاتی ئازادی رۆژنامەگەری بەدەستدەهێنێت

ڕێکخراوی CPJ  نیاز عەبدوڵڵا بە رۆژنامەنووسێكی سەربەخۆی دیار لە هەرێمی كوردستان وەسفدەكات، چونكە لە روماڵكردن  بۆ دەزگاكانی راگەیاندن بەشدارێكی كارای هەیە.

نیاز عەبدوڵڵا ژنە رۆژنامەنوسی كورد خاوەنی خەڵاتی ئازادی رۆژنامەگەری بە PUKmedia ی راگەیاند: خەڵاتەكە لەلایەن كۆمیتەی بەرگری كردن لە رۆژنامەنووسان لە ولایەتە یەكگرتووەكانی ئەمریكا چەند رۆژێك پێش ئێستا راگەیەنرا كە خەڵاتی ئەمساڵی 2022 بۆ ئازادی رۆژنامەوانی نێودەوڵەتی بەخشرا بە بەندە.

وتیشی: خەڵاتی ئازادی لەلایەن كۆمیتەی بەرگری كردن لە رۆژنامەنووسان ساڵانە دەبەخشرێت بە چوار رۆژنامەنووس، بۆ ئەمساڵ چوار كەس دەبنە خاوەنی خەڵاتەكە كە بەندە وەك رۆژنامەنوسێكی هەرێمی كوردستان و  سێ رۆژنامەنووسی دیكە لە هەریەك لە وڵاتەكانی  كوبا، ئۆكرانیا ، ڤێتنام دەبینە خاوەن خەڵاتەكە، هاوكات بڕیارە لە رێوڕەسمێكی گەورەدا مەراسیمی دابەشكردنی خەڵاتەكە لە رۆژی 17 -11-2022 لە ویلایەتە یەكگرتووەكانی ئەمریكا بەڕێوەبچێت.

ئەوەشی خستەڕوو: ئامانج لە بەخشینی خەڵاتەكە رێز گرتن و هاندانە بۆ ئەو رۆژنامەنووسانەی كە توانای خۆیان بە كاردەهێنن لە گەیاندنی هەواڵی وڵاتەكەیان بۆ جیهان بە شێوەیەكی روون و ئاشكرا، هاوكات خەڵاتەكە ئەو رۆژنامەنووسانە دەگرێتەوە كە بە شێوەیەكی بوێرانە  لە وڵاتەكانی خۆیان بوون بە سەرچاوەی ئاشكراكردنی گەندەڵیەكانی پێشێڵكاری یان كاركردن لەسەر دۆسیەكانی پێكهاتە و كەمینەوە و تەنانەت ئاشكراكردنی شێوازەكانی دیكەی راستیەكان.

PUKmedia دیانا ئەحمەد